۱۳.۱.۸۹

فیلمنامه‌ی : نۆره‌ی ئه‌شقێنی


نووسینی :مۆحسێن مه‌خمه‌لباف
وه‌رگێرانی: فه‌وزیه‌ سوڵتانبه‌گی
-به‌هاری 1378

ئیستامبووڵ
 شه‌مه‌نده‌فه‌ر،رۆژ
گوێزه‌ل له‌ شه‌مه‌نده‌فه‌ره‌که‌ داده‌به‌زێ.چڵێک گوڵی به‌ ده‌سته‌وه‌یه‌.له‌ وێستگه‌که‌ ده‌چێته‌ ده‌رێ
 باخی گشتی،درێژه‌...
پیره‌ پیاو دێته نێوباخه‌‌ گشتیه‌که‌.قه‌فه‌زه‌ به‌تاڵه‌که‌ی له‌ شوێنێک داده‌نێ وله‌ نێو داره‌کاندا به‌ شوێن ئه‌و باڵنده‌یه‌ی،ئاوازه‌ دڵگره‌که‌ی، باخه‌ گشتێکه‌ی داگرتووه‌ ده‌گه‌ڕێ.بۆساتێک سه‌معه‌که‌که‌ی له‌ گوێ ده‌ردێنێ.(ده‌نگ له‌ دیمه‌نی فیلمه‌که‌ ده‌بڕدرێ)ئه‌و سیم و دوو شاخه‌یه‌ی به‌ سه‌معه‌که‌که‌وه‌یه‌تی به‌ زه‌بته‌که‌یه‌وه‌ ده‌نێ و ده‌نگی باڵنده‌یه‌ک له‌ زه‌بته‌که‌یه‌وه‌ ده‌بیستێ. پاشان ده‌نگی زۆر ده‌کات .پاش تاوێک بێده‌نگی باڵنده‌یه‌ک وڵامی ده‌نگه‌که‌ ده‌داته‌وه‌.پیره‌ پیاو که‌یفی سازه‌ .قه‌فه‌زه‌که‌ له‌ سه‌رکورسییه‌ک داده‌نێ و لۆچێک دان به‌ شێوه‌ی هێڵێک ،تا ناو قه‌فه‌زه‌که‌ رۆده‌کات ئه‌وسا به‌ ده‌ست لاسایی باڵنده‌یه‌ک ده‌کاته‌وه‌ که‌ به‌ شوێن دانه‌کاندا خۆ به‌ قه‌فه‌زه‌که‌ دا ده‌کات


ده‌رگای قه‌فه‌زه‌که‌ داده‌خرێ و ده‌ستی وه‌به‌ر ده‌که‌وێ.دڵنیایه‌ پیلانه‌که‌ی سه‌رده‌گرێ.میکڕۆفۆنه‌که‌ی که‌به‌سیمێکی باریک و درێژه‌وه‌یه‌ له‌ په‌نهای قه‌فه‌زه‌که‌ داده‌نێ و بۆخۆی دوور ده‌که‌وێته‌وه‌ و له‌ نێو داره‌کاندا خۆی حه‌شار ده‌دات.ماوه‌یه‌ک له‌ چاوه‌ڕوانیدا تێپه‌ڕ ده‌بێ تاکوو هێور هێور ده‌نگی باڵنده‌یه‌کی له‌ گووشی سه‌معه‌که‌که‌یه‌وه‌ ده‌که‌وێته‌ به‌ر گوێ که‌ خه‌ریکه‌ دان هه‌ڵده‌گرێته‌وه‌.پاشان ده‌نگی داکه‌وتنی ده‌رگای قه‌فه‌زه‌که‌ دێت.پیره‌ پیاو به‌ په‌له‌ خۆی ده‌گه‌یه‌نێته‌ قه‌فه‌زه‌که‌.قه‌له‌ڕه‌شه‌یه‌ک به‌ داوه‌وه‌ بووه‌.
ده‌رگای قه‌فه‌زه‌که‌ ده‌کاته‌وه‌ و قه‌له‌ڕه‌شه‌که‌ هه‌ڵده‌فڕێنێ ودیسان دانی دیکه‌ له‌ گیرفانی ده‌ردێنێ و به‌ شێوه‌یه‌ک ڕۆی ده‌کات که‌ باڵنده‌که‌ ناچار بێت درێژه‌ی دانه‌ رژاوه‌که‌ له‌ نێو قه‌فه‌زه‌که‌ دا هه‌ڵگرێته‌وه‌.
ده‌نگی خۆشی ئه‌و باڵنده‌یه‌ی پیره‌ پیاوه‌که‌ی شه‌یدا کردووه‌ هه‌ر وا وڵاتی داگرتووه‌.پیره‌ پیاو دیسان له‌ نێو داره‌کاندا خۆی حه‌شار ده‌داته‌وه‌. بۆیاخچییه‌کی قژکاڵ دێ له‌ سه‌ر کورسیه‌که‌ داده‌نیشێ و چاو له‌ ده‌وروبه‌ری ده‌کات .قه‌فه‌زه‌که‌ سه‌رنجی راده‌کێشێ.چاو له‌ هه‌ر لایه‌ک ده‌کات هیچ که‌س نابینێ.پیره‌ پیاو ناچار له‌ پشت داره‌که‌ دێته‌ ده‌رێ و به‌ ده‌ست لاوه‌ قژ کاڵه‌که‌ تێده‌گه‌یه‌نێ له‌ قه‌فه‌زه‌که‌ دوور که‌وێته‌وه‌.به‌ڵام قژ کاڵ چاوی له‌ جێگایه‌کی دیکه‌یه‌.له‌ درێژه‌ی روانینی لاوه‌ قژکاڵه‌که‌دا،گوێزه‌ل،ژنێکی شۆخ وشه‌نه‌نگ که‌‌ به‌ له‌چکه‌یه‌ک سه‌ر وملی داپۆشیوه‌،دێت له‌ په‌نای قه‌فه‌زه‌که‌ داده‌نیشێ.پیره‌ پیاو ژنه‌که‌ ده‌ناسێته‌وه‌ ،دیسان خۆی مه‌ڵاس ده‌دات‌.ئێستا قه‌فه‌زه‌که‌ له‌ به‌ینی قژکاڵ و گوێزه‌ل دایه‌.گوێزه‌ل چاوێک به‌ ده‌وروبه‌ری دا ده‌گێڕێ.هیچ شتێکی ناکه‌وێته‌ به‌رچاو.پیره‌ پیاو له‌وه‌ی ئاوا به‌ باشی خۆی مه‌ڵاس داوه‌ ئۆخژنی له‌ دڵ ده‌گه‌ڕێ و بزه‌یه‌کی شیرینی دێته‌ سه‌ر لێو.گوێزه‌ل و بۆیاخچی قژکاڵیش پێده‌که‌نن.گوێزه‌ لقێک گوڵ به‌ قژکاڵ ده‌دات.پیره‌پێاو بۆوه‌ی بزانێ چ باسه‌،وڵۆمی سه‌معه‌که‌که‌ی هه‌ڵده‌کێشێ.
ده‌نگی قژکاڵ له‌ وڵۆمی سه‌معه‌که‌که‌وه‌ ده‌بیسترێ.
قژکاڵ:"من که‌وشی هه‌موو که‌سێک به‌ یادی قه‌ده‌می تۆوه‌ بۆیاخ ده‌که‌م".
ئه‌وسا له‌ به‌ر پێی گوێزه‌ل داده‌نیشێ و که‌وشه‌کانی بۆ بۆیاخ ده‌کات گوێزه‌ل ناهێڵێ ،به‌ڵام قژکاڵ خێرا خێرا بۆیاخی بۆلێ ده‌دات.له‌نیزیکه‌وه‌ روخساری قژکاڵ ده‌بینین سه‌یر هه‌وڵ ده‌دات.پیره‌پیاو بۆ ئه‌وه‌ی هیچ ده‌نگێکی له‌ کیس نه‌چێت،هه‌ر واوڵۆمی سه‌معه‌که‌که‌ی ئه‌مباره‌وبار ده‌کات .
گوێزه‌ل:"خۆزگه‌سه‌ربازیت کردبایه‌.
خۆزگه‌ شۆفیری تاکسی بوایه‌ی.ئه‌وکات دایکم منی ده‌ا به‌ تۆ."
ئێستا بۆیاخچی به‌هه‌موو هه‌وڵی خۆیه‌وه‌ که‌وشی گوێزه‌ل بۆیاخ ده‌کات.ته‌نانه‌ت به‌ده‌ست بنی که‌وشه‌کانیشی بۆ خاوێن ده‌کاته‌وه‌.پیره‌ پیاو سه‌ری سوڕ ماوه‌.گوێزه‌ل له‌ سه‌ر زه‌وی داده‌نیشێ و فڵچه‌ی بۆیاخه‌که‌ له‌ ده‌ست قژکاڵ وه‌رده‌گرێ و که‌وشه‌کانی ئه‌و بۆیاخ ده‌کات.پیره‌پیاو به‌ ته‌واو‌ی گێژ بووه‌.
 تاکسی،شه‌قام،شه‌و.
تاکسیه‌که‌ به‌تاڵه‌،قژڕه‌ش لێی ده‌خوڕێ.ژنێک ده‌ست هه‌ڵدێنێ.تاکسی راده‌وه‌ستێ و ژنه‌ سوار ده‌بێ.موسیقایه‌کی خه‌مناک که ‌له ‌ناڵینی مرۆڤێک ده‌چێ له‌زه‌بتی تاکسێکه‌وه‌ بڵاو ده‌بێته‌وه‌.تاکسی وه‌ڕێ که‌وتووه‌.قژڕه‌ش"مێردی گوێزه‌ل"وێنه‌ی هاوسه‌ره‌که‌ی له‌سه‌ر فه‌رمانه‌که‌ داوه‌.له‌گه‌ڵ سوڕانی فه‌رمانه‌که‌ وێنه‌که‌ی گوێزه‌لیش ده‌سوڕێ.
ژنه‌مسافیره‌که‌:من ژنێکی ته‌نیام.ئێوه‌جێگایه‌کتان نییه‌ شه‌و لای ئێوه‌
بمێنمه‌وه‌؟
قژڕه‌ش وه‌ردسوڕێ وته‌مه‌شایه‌کی ژنه‌ ده‌کات و تورمز ده‌گرێ.داده‌به‌زێ و
ده‌چێ له‌گوڵفرۆشی سه‌ره‌رێ لقێک گوڵ ده‌کڕێ .وه‌ڕێ ده‌که‌وێ.ژنه‌پێی
وایه ‌گوڵه‌که‌ی بۆئه‌وکڕیوه‌ ده‌ست دێنێ گوڵه‌که‌ وه‌رگرێ،به‌ڵام قژڕه‌ش لای
لێ ناکاته‌وه
ژنه‌مسافیره‌که‌؛تۆش وه‌ک من ته‌نیای؟
قژڕه‌ش:(وێنه‌ی گوێزه‌لی نیشان ده‌دا.)ژنه‌که‌م له‌تۆ جوانتره‌.دووساڵ
حه‌زم لێ کردووه‌.ئه‌م تاکسیه‌م قیستی کڕی تاکو له‌گه‌ڵ ئه‌وزه‌ماوه‌ند
بکه‌م.بڕۆبیرێکی دیکه‌ بۆ خۆت بکه‌وه‌.
تورمز ده‌گرێ ژنه‌که‌دابه‌زێ.ژنه‌ دانابه‌زێ.
ژنه‌که‌:من هه‌ر ته‌نیام.مه‌به‌ستێکی دیکه‌م نه‌بوو،زه‌مانێک مێردم بوو،بێ
وه‌فایی له‌گه‌ڵ کردم.یه‌کجار زۆرم خۆش ده‌ویست...ده‌مبه‌ی
ژنه‌که‌ت ببینم؟
قژڕه‌ش داده‌به‌زێ ده‌رگای لای سه‌نده‌ڵێکه‌ی دواوه‌ ده‌کاته‌وه‌.په‌ڕۆیه‌ک له‌داشبۆرته‌که‌ی ‌ده‌ردێنێ وله‌ده‌وری ده‌ستی ده‌ئاڵێنێ وژنه‌ده‌کێشێته‌ ده‌رێ.
قژڕه‌ش:به‌ڵێنیم به‌ژنه‌که‌م داوه‌ له‌و زیاتر ده‌ستم له‌هیچ ژنێک نه‌که‌وێ.


ژنه‌ به‌تاقی ته‌نیا له‌شه‌قامه‌که‌ له‌قه‌راغ ئیسکله‌یه‌ک به‌جێ ده‌مێنێ و
تاکسێکه‌ دوور ده‌که‌وێته‌وه‌.

 به‌رده‌رگای ماڵی گوێزه‌ل،درێژه‌.
تاکسیه‌که‌ له‌به‌ر ده‌رگای ماڵێ راده‌وه‌ستێ وقژڕه‌ش به‌ده‌م سه‌ماوگۆرانی کوتنه‌وه‌،خۆبه‌ژوورێدا ده‌کات.ماڵێکی چکۆڵه‌یه‌.ژنه‌که‌ی له‌ماڵێ نییه‌.قژڕه‌ش بانگی ده‌کات به‌ڵام وڵامێک نابیستێ.پاشان گوڵه‌که ‌له‌ حاجه‌تێک ده‌خاو لیباسه‌کانی ده‌گۆڕێ وله‌به‌ر ئاوێنه‌که‌خۆی رێک وپێک ده‌کاو ده‌ست به‌سه‌روقژی دادێنێ.که‌وشه ‌بۆیاخ کراوه‌کانی گوێزه‌ڵ له‌ئاوێنه‌که‌دا دیاره.‌بریقه ‌ده‌ده‌نه‌وه‌. له‌پڕ شتێیه‌ک سه‌رنجی قژڕه‌ش راده‌کێشێ.
له‌پێشداسه‌رنج ده‌داته‌ئاوێنه‌که‌.پاشان وه‌رده‌سوڕێ وچاوی به ‌به‌رانبه‌ری ئاوێنه‌که ‌ده‌که‌وێ. گوێزه‌ل له‌قوژبنێک به‌دانیشتنه‌وه ‌خه‌وی لێ که‌وتووه.
قژڕه‌ش گوڵه‌که‌ هه‌ڵده‌گرێ وله‌کاتێکدا له‌بن لێوه‌وه‌ گۆرانی ده‌ڵێ ده‌چێ بۆلای وگو‌ڵه‌که ‌له‌به‌ر لووتی گوێزه‌ل راده‌گرێ.گوێزه‌ل چاوهه‌ڵدێنێ.
 ماڵی پیره‌پیاو،هه‌رئه‌وکاته‌.
له‌په‌نای قه‌فه‌زه‌ به‌تاڵه‌که‌، قه‌فه‌زێکی دیکه‌ی لێیه‌،قه‌ناریه‌کی تێدا زیندانی
کراوه‌. پیره‌پیاوله‌پشت میزێک که‌پڕه ‌له ‌که‌ل وپه‌لی کاره‌با و شڕوشاڵات
دانیشتووه‌.سه‌معه‌که‌که‌ی له‌گوێ دایه.گوێی داوه‌ته ‌گوێزه‌ل وقژکاڵ.دیسان شریته‌که‌ ده‌گێڕێته‌ دواوه ‌و له‌سه‌رڕا گوێی لێ ده‌گرێته‌وه‌.
 باغی گشتی،رۆژی دوایی.
قه‌فه‌زه‌که ‌‌له ‌سوچێک دانراوه.پیره‌پیاو میکرۆفۆن وسیمه‌که‌ی به‌کورسییه‌کی باغه‌‌گشتێکه‌وه ‌ده‌به‌ستێ.به‌ڵام ئه‌مجاره‌ ته‌نیا به ‌مه‌به‌ستی ئه‌وه‌ی گوێی له‌قسه‌ی ئه‌ودووانه‌ ‌بێت خۆی ده‌شارێته‌وه‌.ئه‌مجاره‌ش له‌پێشدا بۆیاغچی قژکاڵ وپاشان گوێزه‌ل دێن وله‌سه‌رکورسییه‌کی رووبه‌ڕووی کورسێکه‌ی دوێنێکه‌ داده‌نیشن.پیره‌پیاو ده‌نگیان نابیستێ.هه‌رچی وڵۆمی سه‌معه‌که‌که‌ی ده‌سوڕێنێ،ته‌نیا ده‌نگی ئه‌ومه‌له‌ی له‌هه‌وڵی گرتنی دایه ‌زیاتردێ.گوێزه‌ل ئه‌وگوڵه‌ی قژڕه‌ش دوێنێ شه‌وهێنابوویه‌وه ‌ده‌دا به‌قژکاڵ.پاشان هه‌ڵده‌ستن وبه‌په‌نای پیره‌پیاودا تێپه‌ڕ ده‌بن.کاتێ به‌په‌نای پیره‌پیاودا ده‌ڕۆن گوێی له‌ده‌نگی گوێزه‌ل ده‌بێ.
گوێزه‌ل:ده‌بێ ئه‌مڕۆ زوو بڕۆمه‌وه‌.سبه‌ینێ وه‌ره ‌هه‌رله‌وێ پێکه‌وه‌
نه‌هار ده‌خۆین‌‌.
پیره‌پیاوی‌ش قه‌فه‌زوسه‌معه‌که‌که‌ی هه‌ڵده‌گرێ وبه‌دوایاندا ده‌ڕوات.
 هێڵی شه‌مه‌نده‌فه‌ر،رۆژوشه‌و.
گوێزه‌ل ده‌گاته‌ هێڵه‌ئاسنه‌که‌ی ته‌نیشت ئه‌وکۆمه‌ڵه ‌باڵه‌خانه‌یه‌ی تێیدا ده‌ژی.قژکاڵ دڵته‌نگ راده‌وه‌ستێ وبه‌چاوێکی پڕله‌تاسه‌وه ‌سه‌یری دوورکه‌وتنه‌وه‌ی گوێزه‌ل ده‌کات.پیره‌پیاو به‌هێڵی ئاسنه‌که‌دا تا به‌رده‌رگا به‌دوای گوێزه‌ل دا ده‌ڕوات.گوێزه‌ل ده‌چێته‌ژوورێ پیره‌پیاو راده‌وه‌ستێ تا وڵات تاریک دادێ وتاکسیه‌که‌ی قژڕه‌ش دێته‌وه.پیره‌پیاو ده‌چێته‌ پێشێ.له‌دووره‌وه ‌ده‌یبینین له‌گه‌ڵ قژڕه‌ش خه‌ریکی چاک وخۆشییه‌ و به‌ره‌ولای ماڵه‌وه‌دێن.
پیره‌پیاو:چۆن بڵێم...من ئیدی ته‌مه‌نێکم تێپه‌ڕکردووه‌...جاری وایه‌ له‌وه‌ی
شتێکم ‌له‌وه‌ختی خۆیدا نه‌کوتووه‌،په‌شیمان بومه‌ته‌وه‌.ئێوه له ‌
به‌یانیه‌وه ‌تاشه‌وێ زه‌حمه‌ت ده‌کێشن بۆوه‌ی ژنه‌که‌ت
به‌خته‌وه‌ربکه‌ی...نه‌ک بڵێی ئه‌وئینسانێکی خراپ بێت به‌ڵام کاتێ
ئێوه‌ له‌ماڵێ نین. ئه‌و له‌گه‌ڵ پیاوێکی دیکه له‌وپارکه ‌چۆڵه‌ ‌‌چی
ده‌کات.
هه‌ردووکیان بێده‌نگ ده‌بن.قژڕه‌ش کایه ‌به ‌گوڵه‌که‌ی ده‌ستێوه ‌ده‌کات.پاشان هه‌وڵ ده‌دا به‌سه‌رخۆیدا زاڵ بێت.
قژڕه‌ش:باسی ژنه‌که‌ی من ده‌که‌ی؟
پیره‌پیاو:که‌وایه ‌ئێوه ‌ئه‌وگوڵانه‌ی بۆده‌کڕن!؟
پاشان وه‌ک ئه‌وه‌ی په‌شیمان بووبێته‌وه ‌لێده‌دا ده‌ڕوات.قژڕه‌ش هه‌روا له‌دواوه‌ سه‌یری ده‌کات.پاش تاوێک ده‌ڕواته ‌ژوورێ به‌ڵام به‌ پێچه‌وانه‌ی شه‌وی پێشوو گۆرانی ناڵێت.له‌سه‌رخۆ کلیله‌که‌ی له‌ده‌رگاکه‌دا ده‌سوڕێنێ.بێده‌نگ وله‌پڕ خۆ ده‌کا به‌ژوورێدا.
ماڵی گوێزه‌ل،درێژه‌.
له‌حه‌مامه‌وه ‌ده‌نگی گۆرانی کوتنی گوێزه‌ل دێت وله ‌ژێر ده‌رگاکه‌وه‌ هه‌ڵم دێته‌ده‌رێ،مانای گۆرانێکه‌ی گوێزه‌ل ئه‌وه‌یه‌:
"من ئه‌وینی تۆ وه‌ک نه‌هێنییه‌ک له‌دڵما راده‌گرم "
"مه‌گری دڵم ناتوانێ له‌به‌رانبه‌ر گریانی تۆدا
خۆڕاگرێ."
" هانێ دڵم بۆتۆ.ئه‌گه‌ردڵم له‌کن خۆم بێت ده‌مرم.
قژڕه‌ش به‌ دوو دڵێه‌وه‌ ساکی ژنه‌که‌ی ده‌پشکنێ .له ‌ده‌سره‌یه‌کی سپی زیاتر که‌ گوڵێکی سووری له‌سه‌ر گوڵدۆزی کراوه ‌هیچی دیکه ‌نابینێته‌وه‌. قژڕه‌ش له ‌به‌ر ئاوێنه‌که ‌راده‌وه‌ستێ.ده‌ڕوانێته ‌روخساری خه‌ماوی خۆی.ده‌نگی گۆرانی کوتنی گوێزه‌ل هه‌روادێت .
شه‌قام وتاکسی،رۆژی دوایی.
گوێزه‌ل به‌قرتاڵه‌یه‌ک که‌ل وپه‌لی چێشت لێنانه‌وه ‌له‌ماڵێ دێته‌ده‌رێ.قژڕه‌ش له ‌تاکسێکه ‌دایه‌ وهێندێک له‌ دوا‌تره‌وه ‌شوێنی ده‌که‌وێ.گو‌ێزه‌ل ده‌ست له ‌تاکسیه‌کان هه‌ڵدێنێ.قژڕه‌ش خۆی پێ راناگیرێ وتوندتر لێی ده‌خوڕێ وله‌ به‌رده‌م گوێزه‌ل تورمز ده‌گرێ.گوێزه‌ل له‌پێشدا نێوی ئه‌وشوێنه‌ی ده‌یویست بچێت ده‌ڵێ.کاتێ مێرده‌که‌ی ده‌بینێ داده‌چڵه‌کێ ومه‌جبوور سواری تاکسیه‌که‌ده‌بێت.
قژڕه‌ش:بۆکۆێ ده‌چی؟
گوێزه‌ل:ده‌مه‌وێ بچم هێندێ شت ومه‌ک بکڕم .
قژڕه‌ش:شتێکت ده‌وێ بۆبه‌خۆم ناڵێی بیکڕم.
گوێزه‌ل:ئاخرله‌ماڵێ بێ تاقه‌ت ده‌بم .
له‌شوێنێکی دیکه‌گوێزه‌ل داده‌به‌زێنێ.
قژڕه‌ش:زوو بڕۆیه‌وه‌ بۆ ماڵێ.
گوێزه‌ل ده‌ستی بۆته‌کان ده‌دات وده‌ڕوات،تاکسیه‌که ‌ده‌ورێک لێده‌دات وله‌پێچی شه‌قامه‌که‌ی دیکه‌دا له‌شوێنێک که‌"راوه‌ستان قه‌ده‌غه‌یه‌ "تورمز ده‌گرێ.
قژڕه‌ش تاکسێکه‌ به‌جێ دێڵێ وبه‌پێیان وه‌دوای گوێزه‌ل ده‌که‌وێت.
بازاڕ،درێژه‌.
گوێزه‌ل له‌ناو ماسێکاندا،ماسییه‌ک وله‌ناوسه‌وزێکاندا،ده‌سکێ سه‌وزی ونانێک له‌نانه‌وه‌اخانه‌ ده‌کڕێ وسواری عاڕه‌بانه‌یه‌ک ده‌بێ وله‌که‌لی کۆڵانێکدا ون ده‌بێ.قژڕه‌ش هێندێ دوورتربه‌شوێن عاڕه‌بانه‌که‌دا هه‌ڵدێ.
دارستان،ده‌ریا،درێژه‌.
گوێزه‌ل به ‌ده‌ست وبه‌ئه‌ژنۆ ئه‌وچرپی وچاڵه‌ی کۆی کردۆته‌وه‌ ده‌شکێنێ وده‌ینێته ‌سه‌ر ئه‌و ئاوره‌‌ی کردویه‌ته‌وه‌.تاوه‌که ‌له‌ سه‌رکوچکاوره‌که ‌داده‌نێ وماسێکه‌ له ‌قڕتاڵه‌که ‌ده‌ردێنێ وله ‌تاوه‌که‌ی ده‌خات.
قژکاڵ ده‌گاتێ.که‌ل وپه‌لی بۆیاغه‌که‌ی به‌ دارێکه‌وه ‌هه‌ڵده‌واسێ ودێته‌پێشێ. چاوی به‌چاوی گوێزه‌ل وماسێ وتاوه‌که ‌ده‌که‌وێ.
قژکاڵ:"بیرناکه‌یه‌وه‌ ئه‌م ماسییه‌ش ئاشق بێت؟[گوێزه‌ل پێکه‌نینی
به‌قسه‌که‌ی‌دێت.به‌ڵام قژکاڵ ته‌مای خۆی
گرتووه‌و دوور ده‌که‌وێته‌وه‌.]ره‌نگه ‌له ‌ده‌ریا،یه‌کێ چاوه‌ڕوانی
بێت."
به‌ره‌و ده‌ریا ده‌ڕوات.گوێزه‌ل به‌دوایدا هه‌ڵدێ.هه‌ر دووکیان له‌نێوداره‌کاندا ڕاده‌که‌ن.شاڵگه‌ردنه‌که‌ی قژکاڵ به‌لقێکه‌وه‌ گیر ده‌کا وداده‌که‌وێ. گوێزه‌ل هه‌ڵی ده‌گرێته‌وه ‌و خۆی ده‌گه‌یه‌نێته‌ قژکاڵ، قژکاڵ گه‌یشتۆته ‌ده‌ریاکه‌.هه‌ردوو ده‌ستی له‌ئاوه‌که‌ ناوه‌.ماسێکه ‌له‌ناو حه‌وزی ده‌سته‌کانیدایه‌.ئێستا هێدی هێدی خه‌ریکه‌گیانی به‌به‌ردادێ وده‌جوڵێته‌وه‌و به‌به‌ر چاوه‌کانی گوێزه‌ل-ه‌وه ‌به‌ره‌وناخی ده‌ریا ده‌ڕوا
قژکاڵ:ئه‌شق زیندووی کرده‌وه‌.
گوێزه‌ل نوقمی روداوه‌که‌یه‌.
قژکاڵ:[لاقه‌کانی له‌ئاوه‌که‌ ناوه‌] ئه‌م ده‌ریایه ‌منی
گیرۆده ‌کرد.سه‌رده‌مێک له‌قه‌راغ ده‌ریا داده‌نیشتم.ئاشق
بووم
به‌ڵام دڵدارم نه‌بوو،هه‌تائه‌ تۆم دیت.


گوێزه‌ل شاڵگه‌نه‌که‌ده‌خاته‌سه‌رشانی قژکاڵ.
گوێزه‌ل:ئێستاش دڵدارت نییه‌.چونکێ منیشت له‌خۆت کرد.
به‌هه‌ڵاتن دوور ده‌که‌وێته‌وه‌.قژکاڵ به‌ئارامی به‌دوایدا راده‌کات.قژڕه‌ش له‌دووره‌وه‌ ئاگای لێیانه‌.
 مه‌یدانی عاڕه‌بانه‌کان ورێگا پێچه‌ڵاوپێچه‌کانی دارستان،درێژه‌.
گوێزه‌ل سواری کالیسکه‌یه‌ک ده‌بێ وبه‌په‌له دوور ‌ده‌که‌وێته.قژکاڵ ناچار ده‌بێت به‌دوایدا هه‌ڵێت‌و ورده‌ورده‌ خۆی بگه‌یه‌نێته‌ شانی عاڕه‌بانه‌که‌.ئه‌سپه‌کان له‌ژێرقامچی کالیسکه‌چیدا به‌هه‌موو توانایان غارده‌ده‌ن.
قژکاڵیش سوارده‌بێ وشاڵگه‌ردنه‌که‌ی داده‌که‌نێ وبۆ ده‌ره‌وه‌ی کادره‌که‌ی راده‌دێرێ.پاش ساتێک ده‌ستی گوێزه‌ل به‌له‌چکه‌که‌یه‌وه‌ دێته‌ناوکادری قژکاڵه‌وه‌.قژکاڵ له‌چکه‌که ‌به‌سه‌ر خۆی داده‌دا.له‌دیمه‌نێکی دیکه‌داگوێزه‌ل شاڵگه‌ردنه‌که‌ی ئه‌وی له‌سه‌ر کردووه‌و ته‌نیا چاوه‌کانی دیارن.ئه‌سپه‌کان غارده‌ده‌ن،کالێسکه‌چی قامچیه‌که‌ی هه‌ڵده‌سوڕێنێ.با له‌چکه‌که‌ی گوێزه‌ل له‌مل ئه‌وده‌کاته‌وه‌وده‌یبا وبه‌لقه‌دارێکه‌وه‌ گێر ده‌کا.قیژه‌ی گوێزه‌ل وهاواری قژکاڵ دێت.له‌دووره‌وه‌چاومان لێیه‌شاڵگه‌ردنه‌که‌ی قژکاڵیش به‌ده‌م باوه‌ ده‌ڕوا تا ده‌که‌وێته‌سه‌ر له‌چکه‌که‌ی گوێزه‌ل .ئه‌سپه‌کان ،ئه‌سپه‌کان،ئه‌سپه‌کان.قامچی،قامچی،قامچی.قژکاڵ،قژکاڵ،قژکاڵ.یاری شاڵگه‌ردن وله‌چکه‌که ‌با له‌یه‌کیان ده‌ئاڵێنێ.=
قژڕه‌ش ده‌سکه‌ جه‌کێکی به‌ده‌سته‌وه‌یه ‌و به‌دوای عاڕه‌بانه‌که‌دا ڕاده‌کا. ئێستا قامچی ‌هه‌ر واهه‌ڵده‌سورێن وله‌پشتی ئه‌سپه‌کان ده‌درێن .قژڕه‌ش له‌سه‌رکالیسکه‌که‌یه‌.به‌و ده‌سکه ‌جه‌که‌ی پێیه‌تی به‌سه‌ر قژکاڵ وگو‌ێزه‌ل‌ داده‌دات.قیژه‌ی گوێزه‌ل،هاواری قژڕه‌ش.قامچی کالیسکه‌چی.ڕووخساری ئه‌سپه‌کان که ‌غارده‌که‌ن وله‌ گه‌ڵ خۆیان کالیسکه‌که ‌به‌ره‌و ده‌ریا ده‌به‌ن.
 شه‌قام،تاکسی،تاوێک دواتر.
قژڕه‌ش قژکاڵی له‌ کۆڵ کردوه ‌و بۆ لای تاکسێکه‌ی ده‌با و ده‌یخاته‌ سه‌رسه‌نده‌ڵێکه‌ی پشته‌وه‌ و بۆ خۆی له‌ پشت فه‌رمان داده‌نیشێ.گۆێزه‌ل له‌سه‌ر سه‌نده‌ڵێکه‌ی پێشه‌وه‌ بێهۆش که‌وتووه‌.
تاکسێکه‌ وه‌ڕێ ده‌که‌وێ.قژڕه‌ش نیگه‌رانی گۆێزه‌له‌.بانگی ده‌کا وبه‌قوربان و سه‌ده‌قه‌ی ده‌بێ.به‌ڵام گوێزه‌ل بێهۆشه‌ و قژره‌ش به‌ شڵه‌ژاویه‌وه‌ لێ ده‌خوڕێ.قژکاڵ ده‌جووڵێته‌وه‌و خه‌ریکه‌ وه‌هۆش بێته‌وه‌،قژڕه‌ش ئاگای لێده‌بێ.تورمز ده‌گرێ و ده‌سکی جه‌که‌که‌ له‌ژێر داشبۆرته‌که‌ ده‌ردێنێ و دیسان به‌ سه‌ری قژکاڵی داده‌کوتێ.قژکاڵ بێهۆش ده‌بێته‌وه‌.تاکسی به‌توندی و به‌ سیگناڵ لێدان به‌ پێچه‌وانه‌ی ده‌ستی خۆی ،له‌م شه‌قام بۆ ئه‌و شه‌قام ده‌ڕوات.
 نه‌خۆشخانه‌، شه‌و، کالیسکه‌، رۆژ.
پیره‌پێاو له‌ پیاده‌رۆکه‌ ره‌ت ده‌بێ و ده‌چێته‌ ئه‌و ژووره‌ی گوێزه‌ل لێی که‌وتووه‌.له‌ گه‌ڵ چوونه‌ ژووره‌وه‌ی پیره‌پێاو،گوێزه‌ل ته‌مه‌شای ده‌کات.پیره‌پێاو دێته‌ پێشێ و به‌ خه‌جاڵه‌تێه‌وه‌ شاڵگه‌ردنه‌که‌ی قژکاڵی ده‌داته‌ ده‌ست.
پیره‌پێاو:ببوره‌،نه‌مزانی ئاوای لێدێ.
گوێزه‌ل شاڵگه‌ردنه‌که‌ وه‌ر ده‌گرێ.بۆنی پێوه‌ ده‌کا پاشان هه‌ڵیداوێ بۆ حه‌وا.وێنه‌یه‌کی کورت له‌ شاڵگه‌ردنه‌که‌ که‌ با له‌ کالیسکه‌که‌وه‌ بۆ حه‌وای ده‌بات.
دادگا.رۆژ.
دادگایه‌کی چکۆله‌یان وه‌ڕێ خستووه‌،قازی و کار به‌ ده‌ستانی دادگا له‌ شوێنی خۆیان دانیشتوون،پیره پیاو ودایکی گوێزه‌ل له‌ شوێنی بینه‌ران دانیشتوون.
قژڕه‌ش: ‌شۆفیرێکی باش بووم.هه‌میشه‌ بیمه‌کانم له‌کاتی خۆیدا ده‌دا.ماڵیاتم
ده‌دا.به ‌ژنه‌که‌م وه‌فادار بووم.ژنه‌که‌م هه‌موو ژیانم بوو.کاتێ خیانه‌تی
پێ کردم ئیتر هیچ شتێکم بۆ نه‌مابۆوه‌ ئارامیم پێ ببه‌خشێ.هیچ
کات بیرم نه‌ده‌کرده‌وه‌ رۆژێک ببمه‌ قاتڵ.
قازی:[ده‌سکی جه‌کی تاکسێکه‌ی وه‌ک که‌ره‌سه‌ی قه‌تڵ به‌ده‌سته‌وه‌یه‌.] تۆ
مه‌حکوم به‌ ئێعدامی.دوایین به‌رگری خۆت بڵێ.
قژڕه‌ش:من به‌رگریم له‌نامووسم کردووه‌.ئه‌گه‌ر وامنه‌کردبایه‌ له‌ خۆم خۆش
نه‌ده‌بووم.من ئه‌رکی خۆم به‌ جێ هێناوه‌.ئه‌من رازیم.به‌خته‌وه‌رم.
قازی:به‌ڵام من به‌ش به‌ حاڵی خۆم ناڕازیم.قازی هیچ قازانجێکی له‌ ئیعدامی هیچ
که‌سێک پێ ناگات ئه‌مه‌ کۆمه‌ڵه‌ قازانج ده‌کات.دادگا به‌رگری له‌ مافی ژیانی خه‌ڵک
ده‌کا.جگه‌ له‌ یاسا هیچ که‌س مافی ساندنی ژیانی که‌سێکی دیکه‌ی نییه‌...چه‌نده‌م پێ
خۆش بووئازادت بکه‌م.تێتده‌گه‌م له‌ چ بارودۆخێک دای.به‌ڵام من هیچم له‌ده‌ست
نایات.به‌ڵام چونکێ بۆ خۆت،خۆتت ناساندووه‌ ده‌توانی بۆ خۆت چۆنێتی
مردنه‌که‌ت هه‌ڵبژێری.
قژڕه‌ش:بمخه‌نه‌ ده‌ریاوه‌.چونکێ نه‌نکم ده‌یکوت هه‌رکه‌س له‌ ده‌ریادا بمرێ،جارێکی
دێته‌وه‌ سه‌ر دنیا.
دایکی گوێزه‌ل:(له‌ جێگای خۆی هه‌ڵده‌ستێ.)زاواکه‌م مه‌کووژن.من لێی رازیم.ئه‌و
کچه‌که‌می به‌خته‌وه‌ر کردبوو.
قازی بۆوه‌ی دایکی گوێزه‌ل بێده‌نگ بێت له‌ سه‌ر میزه‌که‌ ده‌کوتێ
قازی:ئیتر قسه‌یه‌کت نییه‌؟
قژڕه‌ش:با...،شتێک ئازارم ده‌دات.من ژنه‌که‌مم به‌خته‌وه‌ر کردبوو.ئه‌وژیانه‌خۆشه‌م بۆ
پێک هێنا بوو.بۆ ئاشقی بۆیاغچییه‌ک بوو.شۆفیرێکی تاکسی چی له‌ بۆیاغچییه‌ک
له‌متره‌؟ئێوه‌ پێتان وایه‌ من له‌و ناحه‌زتر بم؟
ده‌ریا،که‌شتی،خۆرئاوا. .
که‌شتییه‌ک له‌ ده‌ریادا به‌ره‌وپێش ده‌ڕوات.چه‌ند مه‌لێوان قژڕه‌ش دێننه‌ سه‌ر که‌شتێکه‌.یه‌کێکیان ئاڵایه‌ک که‌ ته‌رازووی عه‌داڵه‌تی له‌ سه‌ر کێشراوه‌بۆوه‌ به‌ ته‌ناف هه‌ڵده‌کیشێ.مه‌لێوانه‌کان ده‌ست و لاقی قژڕه‌ش ده‌گرن وله‌ تابوتێکی ده‌خه‌ن.ده‌رگای تابوته‌که‌ پێوه‌ده‌ن.به‌ڵام ویده‌چێ یه‌کێک که‌ مه‌لێوانه‌کان ده‌رگای تابوته‌که‌ جوان کیپ ناکات.پاشان به‌ ده‌ستووری سه‌رۆکی مه‌لێوانه‌کان تابوته‌که‌ ده‌خه‌نه‌ ده‌ریاوه‌.
 نه‌خۆشخانه‌،رۆژ.
دوربین به‌ رێره‌وی نه‌خۆشخانه‌که‌دا ده‌ڕوات.هات و‌ چۆ به‌رده‌وامه‌.له‌ رادیۆوه ‌ئه‌وگۆرانییه‌ی گوێزه‌ل له‌ حه‌مامدا ده‌یکووت ده‌بیستین.کامێرا ده‌گاته‌ ئه‌و وه‌تاغه‌ی گوێزه‌ل تێیدا که‌وتووه‌.دایکی گوێزه‌ل له‌ په‌نایه‌وه‌ دانیشتووه‌.گوێزه‌ل به‌ بێده‌نگی ده‌ڕوانێته‌ چاوه‌کانی دایکی.ماوه‌یه‌ک به‌ بێده‌نگی تێپه‌ڕ ده‌بێ.
گوێزه‌ل:دایه‌ بۆ مه‌جبورت کردم له‌ گه‌ڵ که‌سێک که‌ خۆشم ناوێ زه‌ماوه‌ند
بکه‌م.
دایکی گوێزه‌ل:تۆ هێشتا له‌ ژیان ناگه‌ی.خۆ ژیان هه‌موی هه‌ر دڵداری کردن
نییه‌.من سێ جار ئه‌م چێشتووه‌.
کامێرا دیسان له‌ رێره‌وه‌که‌دا هه‌ر به‌و جێگایه‌ی جاری پێشوو پێیدا هاتبوو وه‌ڕێ ده‌که‌وێ.هێشتا ده‌نگی گۆرانێکه‌ هه‌ر دێت.هیچ هات و چۆیه‌ک له‌ رێڕه‌وه‌که‌دا نییه‌.کامێرا دێته‌ ژورێ.گوێزه‌ل به‌ ته‌نیایه‌، هه‌ڵده‌ستێ.شوشه‌ حه‌به‌که‌ رۆ ده‌کاته‌ مستێه‌وه‌و چوارچوار و پێنج وپێنج به‌ ئاوه‌وه‌ قوتیان ده‌دات.ئه‌وسا لیباسه‌کانی له‌ کومێده‌که‌ ده‌ردێنێ و له‌ به‌ریان ده‌کات.هێواش چاوێک له‌ رێره‌وه‌که‌ ده‌کا و له‌ دیوه‌که‌ وه‌ده‌ر ده‌که‌وێ.
 بازاڕ،ده‌ریا،درێژه‌.
گوێزه‌ل ده‌چێ بۆ بازاڕ،ماسییه‌ک ده‌کڕی.خۆی ده‌گه‌یه‌نێته‌ قه‌راغ ده‌ریا.ماسێکه‌ ده‌خاته‌ حه‌وزی ده‌سته‌کانێوه‌.به‌ڵام هه‌رچی چاوه‌ڕوان ده‌بێ ماسێکه‌ زیندوو نابێته‌وه‌.ناچار ماسێکه‌ فڕێ ده‌دا و ده‌ڕوات.
مه‌یدانی کالیسکه‌کان و دارستان،رۆژ.
گوێزه‌ل ده‌گاته‌ مه‌یدانی کالیسکه‌کان.چه‌ند منداڵێکی گه‌ڕۆک خه‌ریکی ساز لیدانن.کالیسکه‌یه‌ک به‌کرێ ده‌گرێ ومنداڵه‌کان له‌ گه‌ڵ خۆی سوار ده‌کات.کالێسکه‌که‌ وه‌ڕێ ده‌که‌وێ،ئێستا منداڵه‌کان سازلێده‌ده‌ن و کالێسکه‌ ده‌ڕواو گوێزه‌ل ورده‌ ورده‌ حاڵی به‌ره‌و خراپ بوون ده‌چێ.ده‌ست به‌ دڵێوه‌ ده‌گرێ و خۆی وێک دێنی.منداڵه‌کان سازلێده‌ده‌ن،تا ده‌گه‌نه‌ ئه‌و مه‌یدانه‌ی گوێزه‌ل جاری پێشوو ئاوره‌که‌ی لێکردبۆوه‌.دێته‌ خۆارێ و له‌ په‌نای کوچکاوره‌ کووژاوه‌که‌ داده‌نیشێ.پاشان هه‌ڵی ده‌کاو ده‌ڕوانێته‌ کالێسکه‌ وێستاوه‌که‌و ئه‌و منداڵانه‌ی سازلێده‌ده‌ن.گوێزه‌ل ورده‌ ورده‌ حاڵی خراپتر ده‌بێ.هه‌رچی پووڵ له‌ کیفه‌که‌ی دایه‌ ده‌ری دێنێ و له‌ به‌ینی کالێسکه‌چی و منداڵه‌کاندا به‌شی ده‌کات و ئاماژه‌یان پێده‌کات بڕۆن.منداڵه‌کان سواری کالێسکه‌که‌ ده‌بن و به‌ سازلێدان دوور ده‌که‌ونه‌وه‌.گوێزه‌ل که‌له‌ سه‌ره‌مه‌رگ دایه‌ چاوی بڕیوه‌ته‌ ئه‌و کالێسکه‌یه‌ی موسیقاکه‌ له‌گه‌ڵ خۆیدا ده‌بات.ده‌ڵێی چاوی به‌ مۆله‌ق وه‌ستاوه‌.
باخی گشتی،رۆژ.
پیره‌پیاو به‌سه‌رنجێکی تایبه‌ته‌وه‌ که‌ل و په‌له‌که‌ی داده‌مه‌زرێنێ.میکڕۆفۆنێکی بچوک به‌ قه‌فه‌زه‌که‌وه‌ ده‌به‌ستێ و سیمه‌که‌شی به‌سه‌معه‌که‌یه‌وه‌ ده‌نێ و له‌ نێو داره‌کاندا خۆی ده‌شارێته‌وه‌.ده‌نگی باڵنده‌که‌ له‌ زه‌بته‌ چکۆڵه‌که‌ی پیره‌پیاوه‌وه‌ بڵاو ده‌بێته‌وه‌ و ده‌نگێکی وه‌ک ئه‌و له‌ نێو داره‌کاندا وڵامی ده‌داته‌وه‌.
 شه‌مه‌نده‌فه‌ر،رۆژ.
گوێزه‌ل له‌ شه‌مه‌نده‌فه‌ره‌که‌ دایه‌.ده‌ستفرۆشه‌کان خه‌ریکی فرۆشتنی شته‌کانیانن.فاڵگرێ فاڵ ده‌فرۆشێ.پیرێژنێک رووبه‌ڕووی گوێزه‌ل دانیشتووه‌ ‌،فاڵێ هه‌ڵده‌گرێ،ده‌یکاته‌وه‌و ده‌یداته‌ ده‌ست فاڵگره‌که‌.
پیرێژن:من سه‌وادم نییه‌ بۆ خۆت بۆمی بخوێنه‌وه‌.
فاڵگره‌که‌:منیش سه‌وادم نییه‌.
پیرێژن:[رووده‌کاته‌ گوێزه‌ل]خاتوون ئێوه‌ سه‌وادتان هه‌یه‌؟.
گوێزه‌ل گوێی پێ نادا.لاوێک که‌ ده‌ستی به‌ میله‌یه‌کی ئاسنه‌وه‌ گرتووه‌،دێته‌ پێشێ و فاڵه‌که‌ له‌ده‌ست پیرێژنه‌که‌ وه‌رده‌گرێ بیخوێنێته‌وه‌.
لاوه‌که‌:[له‌ رووی فاڵه‌که‌وه‌]
په‌ریه‌کی چکۆڵه‌ی خه‌مین ده‌ناسم
له‌ ئه‌قیانوسێکا ده‌ژی و
دڵی له‌ شمشاڵێکی دارینا
ئه‌ژه‌نێ هێدی هێدی
په‌ریه‌کی چکۆڵه‌ی خه‌مین
به‌ ماچێک سه‌ر ده‌نێته‌وه‌ شه‌وێ و
به‌ ماچێک له‌ دایک ده‌بێ به‌یانی.
شه‌مه‌نده‌فه‌ره‌که‌ راده‌وه‌ستێ.گوێزه‌ل هه‌ڵده‌ستێ دابه‌زێ.
 باخی گشتی.درێژه‌.
گوێزه‌ل له‌ولاوه‌ دێت.چاوێک به‌ ده‌وور و به‌ریدا ده‌خشێنێ.خۆی ده‌گه‌یه‌نێته‌ ئه‌و سه‌نده‌ڵیه‌ی قه‌فه‌زێكی له‌ سه‌ره‌،سووکێ داده‌نیشێ.له‌ گه‌ڵ که‌سێکی دیکه‌ که‌ له‌ سه‌ر سه‌نده‌ڵێکه‌ دانیشتووه‌ و ئێمه‌ هێشتا نه‌ماندیوه‌ قسه‌ ده‌کات.پیره‌پیاو هه‌ر وه‌ک جاری پێشوو ده‌یه‌وێ سه‌ر له‌ کاره‌که‌ ده‌ربێنێ و هه‌ر کایه‌ به‌ وڵۆمی سه‌معه‌که‌که‌ی ده‌کات.ماوه‌یه‌ک ده‌نگیان نابیسێ.پاشان جه‌مسه‌رێکی سیمه‌که‌ی که‌ هه‌ڵبڕاوه‌ ده‌دۆزێته‌وه‌ و پێوه‌ی ده‌نێته‌وه‌ و ده‌نگه‌که‌ی دێته‌گوێ.
گوێزه‌ل:خۆزگه‌ سه‌ربازیت کردبایه‌.خۆزگه‌ شۆفیری تاکسی بوایه‌ی.ئه‌وسا
دایکم منی ده‌دا به‌ تۆ.
ده‌نگی پیاوێک:ده‌زانی به‌خته‌وه‌ری له‌ چی دایه‌؟له‌وه‌دایه‌ تاکسیت
هه‌بێ.سه‌ربازیت کردبێت.
به‌ رووخساری پیره‌پیاودا واده‌ر ده‌که‌وێ له‌ سه‌ر جێگاکه‌یان هه‌ستاون و به‌ به‌ر ده‌م ئه‌ودا تێده‌په‌ڕن.که‌ پشتیان ده‌که‌وێته‌ پیره‌پیاو ده‌یانبینین.کابراکه‌ قژی ره‌شه‌،به‌ڵام هێشتا به‌ جوانی دیار نییه‌.پیره‌پیاو به‌دوایان ده‌که‌وێت.
هێڵی رێگای ئاسن و به‌ر ده‌رگای ماڵی گوێزه‌ل.
گوێزه‌ل به‌ره‌و لای ماڵی خۆیان ده‌ڕواو قژڕه‌ش به‌چاوی پڕ له‌ تاسه‌وه‌ سه‌یری ده‌کات که‌ به‌ سه‌ر هێڵه‌کاندا هه‌نگاو ده‌نێ و دوور ده‌که‌وێته‌وه‌.پیره‌پیاو به‌ سه‌ر هێڵه‌که‌دا به‌شوێن گوێزه‌ل ده‌که‌وێت.گوێزه‌ل ده‌چێته‌ ژوورێ.پیره‌پیاو له‌ به‌ر ده‌رگای ماڵی گوێزه‌ل چاو له‌ قژڕه‌ش ده‌کا که‌ له‌ سه‌ر هێڵه‌که‌ راوه‌ستاوه‌و ته‌مه‌شایان ده‌کات.
تاکسی مێرده‌که‌ی گوێزه‌ل دێته‌وه‌ له‌ کاتێکدا ئه‌مجاره‌ قژکاڵ لێی ده‌خوڕێ.پیره‌پیاو به‌ ئاماژه‌ی ده‌ست قژڕه‌شی پیشان ده‌دات که‌ له‌ سه‌ر هێڵه‌که‌ راوه‌ستاوه‌.
پیره‌پیاو:ئێوه‌ ئه‌و پیاوه‌ ده‌ناسن؟
قژکاڵ:کامه‌ پیاو؟
قژڕه‌ش خه‌ریکه‌ له‌ سه‌ر هێڵکه‌ دوور ده‌که‌وێته‌وه‌ و ته‌نیا له‌ پشته‌وه‌ ده‌یبینین.
پیره‌پیاو:ئه‌و کابرایه‌ی خه‌ریکه‌ دوور ده‌که‌وێته‌وه‌.
قژکاڵ:کامه‌؟
پیره‌پیاو:وام زانی له‌گه‌ڵ ژنه‌که‌ت خزمایه‌تی هه‌یه‌.ده‌زانی چییه‌؟من له‌و باخه‌
گشتیه‌دا
خه‌ریکی ئه‌وه‌م جوتێک بۆ قه‌نارێکه‌م بگرم.به‌ڵام ئه‌و ژنه‌ی تۆ هۆشی بۆ
نه‌هێشتومه‌تووه‌.ئێسته‌ ماوه‌یه‌که‌ له‌ گه‌ڵ ئه‌م کابرایه‌...[دوو دڵه‌]لێگه‌ڕێ کاره‌که‌ پیستر
بێ.
قژکاڵ:ژنه‌که‌ی من ده‌ڵێی؟
پیره‌پیاو:باسی قه‌نارێکه‌ی خۆم ده‌که‌م.جوتێکی بوو مرد.رۆژێکیان به‌ هه‌ڵکه‌وت له‌
باخی گشتی گوێم له‌ ده‌نگی قه‌نارییه‌ک بوو.بۆوه‌ی قه‌نارێکه‌ی خۆم له‌ ته‌نیایی رزگاری
بێت
ده‌ڵێم بیگرم.له‌وه‌ته‌ی جوته‌که‌ی مردوه‌وه‌ ئیدی ناخوێنێ.ده‌ی! ئێوه‌ ماندون بڕۆنه‌
ژوورێ.
لێده‌دا ده‌ڕوات.قژکاڵیش هه‌روا راوه‌ستاوه‌ و ته‌مه‌شای ده‌کا خه‌ریکه‌ دوور ده‌که‌وێته‌وه‌.کاتێ ده‌یه‌وێ بچێته‌ ژوورێ ئه‌و لقه‌ گوڵه‌ی کڕیوێتی له‌ نێو ماشێنه‌که‌ ده‌ردێنێ.
ماڵی گوێزه‌ل،رۆژ.
قژکاڵ ده‌چێته‌ ژوورێ.گوێزه‌ل له‌ چێشتخانه‌خه‌ریکی چێشت لێنانه‌ و هه‌ر ئه‌و گۆرانییه‌ ده‌ڵێ وا جاری پێشوو له‌ حه‌مامدا ده‌یکوت.'من ئه‌وینی تۆ وه‌ک نه‌هێنیه‌ک له‌ دڵما راده‌گرم.'قژکاڵ ده‌رگای چێشتخانه‌که‌ ده‌کاته‌وه‌.گوێزه‌ل ده‌یبینێ.سڵاوی لێده‌کا و خه‌ریکی چێشته‌که‌ی ده‌بێته‌وه‌.قژکاڵ گوڵ به‌ده‌ست له‌ به‌ر ده‌رگای چێشتخانه‌که‌ راده‌وه‌ستێ.
قژکاڵ:ئه‌مشه‌و بچین بۆ ماڵی دایکت؟
گوێزه‌ل:ئه‌وه‌ چۆنه‌؟!خۆئه‌وه‌نده له‌ مێژ‌ نییه‌ له‌ ماڵی دایکم بوین.
قژکاڵ:بۆ خۆت ده‌زانی چه‌نده‌م دایکت خۆش ده‌وێ.له‌ سایه‌ی سه‌ری
دایکته‌وه‌ تۆم هه‌یه‌.
گوێزه‌ل درێژه‌ به‌ گۆرانی کوتنه‌که‌ی ده‌دا.قژکاڵ له‌ بن لێوه‌وه‌ گۆرانێکه‌ی له‌گه‌ڵ ده‌ڵێته‌وه‌.گوێزه‌ل بێده‌نگ ده‌بێ،قاپێک ئاو له‌ تاوه‌که‌ ده‌کا.چزه‌چزی لێ هه‌ڵده‌ستێ و بێ سه‌رنجدان به‌ قژکاڵ به‌به‌ر ده‌میدا داچێته‌ وه‌تاغه‌که‌ و ده‌رگا له‌ سه‌ر خۆی داده‌خا.قژکاڵ ده‌چێته‌ پشت ده‌رگا داخراوه‌که‌ و چه‌ند جار بانگی لێده‌کا به‌ڵام وڵامێک نابیسێ.
 شه‌مه‌نده‌فه‌ر،رۆژ.
قژڕه‌ش له‌شه‌مه‌نده‌فه‌ره‌که‌دا خه‌ریکی درست فرۆشییه‌.ئاولیمۆ گیره‌که‌ی له‌ دڵی لیمۆکان رۆده‌کاو لیمۆکه‌ له‌ په‌نجه‌کانیدا ده‌کوشێ و ئاوی لیمۆکه‌ ده‌چۆڕێنێته‌ لیوانه‌که‌وه‌ و ده‌یداته‌ ده‌ست مشته‌رێکان.
 تاکسی و شه‌مه‌نده‌فه‌ر،درێژه‌.
گوێزه‌ل له‌ شه‌قامه‌که‌وه‌ خه‌ریکه‌دێت.قژکاڵ به‌ تاکسێکه‌وه‌ وه‌شوێنی که‌وتووه‌.ئه‌و گوڵه‌ی دوێ شه‌و قژکاڵ بۆی کری بووبه‌ ده‌ستێوه‌یه‌تی.سواری شه‌مه‌نده‌فه‌ره‌که‌ ده‌بێ.قژکاڵ تاکسێکه‌ به‌ جێ دێڵێ.به‌ دوای گوێزه‌ل دا،له‌ دوایین ساتدا سواری شه‌مه‌نده‌فه‌ره‌که‌ ده‌بێ.گوێزه‌ل له‌ سه‌ر ته‌ختێک داده‌نیشێ.قژکاڵ له‌ په‌ناوه‌یه‌تی.گوێزه‌ل به‌ سه‌ر سووڕمانه‌وه‌ ته‌مه‌شای ده‌کات.
گوێزه‌ل:له‌ کوێ بوی؟
قژکاڵ:تۆ له‌ کوێ بوی؟
گوێزه‌ل:ده‌چم شت ده‌کڕم.
قژکاڵ:شتێکت ده‌وێ بۆ به‌ خۆم ناڵێی بیکڕم؟
گوێزه‌ل:له‌ ماڵێ به‌ته‌نیا بێ تاقه‌ت ده‌بم.
قژڕه‌ش ده‌یانبینێ،له‌ شه‌مه‌نده‌فه‌ره‌که‌دا دێت و ده‌چێت و وه‌رای ئاولیمۆده‌کات.به‌ڵام چاوی هه‌رله‌ گوێزه‌ل - ه‌.یه‌ک دوو مشته‌ری بۆ کڕینی ئاولیمۆ ده‌ستیان بۆ لای درێژ ده‌که‌ن.که‌چی ئه‌و ئاگای له‌ خۆ نییه‌ و نایانبینێ.قژکاڵ ده‌یبینێ و بانگی ده‌کا.قژڕه‌ش ده‌چێته‌ پێشێ. که‌ره‌سه‌ی ئاولیمۆ گیره‌که‌ی له‌ ناخی لیمۆیه‌ک رۆده‌کا و لیمۆکه‌ به‌ په‌نجه‌ رێک ده‌کوشێ.چاوی له‌ گوێزه‌له‌.گوێزه‌ل له‌ ترسی میرده‌که‌ی رووی وه‌رگێڕاوه‌و له‌ په‌نجه‌ره‌که‌وه‌ ته‌مه‌شای ده‌ره‌وه‌ ده‌کات.لیوانی ئاولیمۆکه‌ به‌ده‌ست قژکاڵه‌وه‌یه‌.قژڕه‌ش هه‌روا ئاوی لیمۆکه‌ ده‌گرێ و ده‌یکاته‌ لیوانه‌که‌وه‌ تاکو سه‌رڕێژ ده‌بێ.
 باخی گشتی،رۆژی دوایی.
مه‌لێک له‌ سه‌رداره‌کان ده‌خوێنێ و پیره‌پیاو له‌ حه‌ولی گرتنی دایه‌.قژڕه‌ش له‌ولاوه‌ دێت و له‌ په‌نای قه‌فه‌زه‌که‌ داده‌نیشێ.پیره‌پیاو خۆی حه‌شار ده‌دات و زه‌بته‌که‌ی هه‌ڵده‌کا.گوێزه‌ل _ یش ده‌گاتێ و له‌ ته‌نیشت ئه‌و داده‌نیشێ.پیره‌پیاو گۆیی له‌ قسه‌کانیان راگرتووه‌.له‌ به‌ینی داره‌کانه‌وه‌ چاوی به‌ قژکاڵ ده‌که‌وێ له‌ تاکسێکه‌ی داده‌به‌زێ.جه‌کێکی به‌ ده‌سته‌وه‌یه‌ و بۆ لای ئه‌وان دێت.پیره‌پیاو خۆی حه‌شار ده‌دات.ده‌نگی ئه‌و سازه‌ی له‌ سه‌ره‌تای دیمه‌نه‌که‌وه‌ دێت به‌رزتر ده‌بێت.به‌جۆرێک پیره‌پیاو به‌ زه‌حمه‌ت گوێی له‌ قسه‌کانی قژڕه‌ش و گوێزه‌ل ده‌بێت.ده‌نگی سازه‌که‌ له‌ گه‌ڵ نزیک بوونه‌وه‌ی ئه‌و منداڵانه‌ی ده‌یان ژه‌نی نزیکتر ده‌بێته‌وه‌.پیره‌پیاو وڵۆمی سه‌معه‌که‌که‌ی ده‌باته‌ سه‌رێ،به‌ڵام ده‌نگی سازه‌که‌ دیسانیش ناهێڵێ هیچ شتێک ببیسێت.ئێسته‌ منداڵه‌ گه‌ڕۆکه‌کان له‌ به‌ر ده‌می پیره‌پیاو راوه‌ستاون و ساز لێده‌ده‌ن و داوای پاره‌ی لێده‌که‌ن.پیره‌پیاو هه‌وڵ ده‌دات منداڵه‌کان دورخاته‌وه‌،به‌ڵام ئه‌وان به‌ لاسارییه‌وه‌ هه‌ر ده‌ژه‌نن.قژکاڵ له‌ قژڕه‌ش و گوێزه‌ل نزیک بۆته‌وه‌.پیره‌پیاو له‌ داخان سه‌معه‌که‌که‌ له‌ گوێچکه‌ی ده‌ردێنێ.ده‌نگی ساز و ده‌نگی ناو دیمه‌نه‌که‌ ته‌واو ده‌بێ.قژکاڵ هه‌ڕا ده‌کاته‌ قژڕه‌ش.منداڵه‌کان له‌ سه‌ره‌ خۆ هه‌روا ساز لێده‌ده‌ن.گوێزه‌ل هه‌وڵ ده‌دا ده‌ستی قژکاڵ بگرێ،که‌چی زه‌ربه‌یه‌کی لێ ده‌که‌وێ و به‌عه‌رزیدا ده‌که‌وێ.پیره‌پیاو دیسان سه‌معه‌که‌که‌ له‌ گوێی ده‌کاته‌وه‌.ده‌نگی به‌رزی سازه‌که‌ دێته‌وه‌ نێو دیمه‌نه‌که‌.ده‌سکی جه‌که‌که‌ ده‌که‌وێته‌ ده‌ست قژڕه‌ش به‌ چه‌ند زه‌ربه‌ قژکاڵ له‌ کار ده‌خاو هه‌ڵدێ.
 دادگا،رۆژ.‌
قازی و ئه‌ندامانی دادگا له‌ شوێنی تایبه‌تی خۆیان دانیشتوون پیره‌پیاو و دایکی گوێزه‌ل له‌ شوێنی بینه‌ران دانیشتوون.
قازی:تۆ مه‌حکوم به‌ مه‌رگ کراوی.دادگا ده‌یه‌وێ دوایین به‌رگریت ببیسێ.
قژڕه‌ش:من رازیم له‌ پێناو عه‌شقێکدا بوومه‌ ده‌کوژرێم.
قازی:به‌ڵام دادگا ناڕازییه‌.دادگا هیچ قازانجێکی له‌ ئیعدامی هیچ که‌سێک پێ
ناگات.ئه‌مه‌ کۆمه‌ڵه‌ قازانج داکات.دادگا به‌رگری له‌ ناموسی خه‌ڵک
داکات.جگه‌ له‌ یاسا هیج که‌س مافی ساندنی گیانی که‌سێکی دیکه‌ی نییه‌.من
به‌ش به‌حاڵی خۆم پێم خۆش بوو کارێکت بۆ بکه‌م.
دایکی گوێزه‌ل:[هه‌ڵده‌ستێه‌ پێ] ئه‌و ده‌بێ سه‌زا بدرێ چه‌ند جار هاتبووه‌
خوازبێنی کچه‌که‌م.پێم کوت:"به‌د به‌ختی ده‌که‌ی.مێردی کچه‌که‌م
هه‌مووشتێکی بۆدابین کردووه‌.له‌ هیچ شتێکی که‌م نییه‌.ئه‌م قاتڵه‌ به‌خته‌وه‌ری
کچه‌که‌می تێک دا.
قازی بۆوه‌ی دایکی گوێزه‌ل بێده‌نگ بێت به‌ چه‌کوچ له‌ سه‌ر میزه‌که‌ ده‌کوتێ.
قازی:وه‌سێتێکت نییه‌؟
قژڕه‌ش:جگه‌ له‌ خودا هیچ که‌سێکم نییه‌ وه‌سێتی بۆبکه‌م.پێم خۆشه‌ پێی
بڵێم[رووده‌کاته‌ ئاسمان] خودایه‌ له‌م دنیایه‌ زۆر خۆشم رابوارد.ئه‌گه‌ر ویستت
جارێکی دیکه‌ بمهێنیه‌وه‌ دنیا،هه‌ر ئاوا بمهێنه‌وه‌.
قازی:یانی له‌و کاره‌ی کردوته‌ په‌شیمان نی؟
قژڕه‌ش:پێش ئه‌وه‌ی ئاشق بم ژیانم زۆر به‌ ناخۆشی تێپه‌ڕ ده‌بوو.
په‌شیمانم له‌وه‌ی هه‌موو ته‌مه‌نم ئاشق نه‌بووم.داوای لێبوردن له‌ خودا ده‌که‌م.
قازی:زگم پێت ده‌سووتێ.به‌ڵام ناتوانم سه‌زات نه‌ده‌م.یاسا رێگایه‌کی بۆت
نه‌هێشتۆته‌وه‌.به‌ڵام ده‌توانی شێوه‌ی مردنه‌که‌ت بۆ خۆت هه‌ڵی بژێری ته‌نیا
ناتوانی داوای ئه‌وه‌ بکه‌ی بتخه‌نه ده‌ریاوه‌.چونکێ،تێبینییه‌ک پێشی ئه‌م کاره‌مان
لێ ده‌گرێ.
قژڕه‌ش:که‌وایه‌ پێم خۆشه‌ هه‌ر له‌و جێگایه‌ی دڵداریم لێ کردووه‌ بمرم.له‌ژێر ئه‌و
داره‌ی له‌گه‌ڵ دڵداره‌که‌م له‌وێ بووین.
قازی:من پرسیارێکم بۆ پێش ها‌تووه‌.هاوسه‌ری ئه‌م ژنه‌ له‌ تۆ جوانتره‌
،تاکسی هه‌یه‌،تۆ هه‌م له‌و ناحه‌زتری و هه‌میش ده‌ستفرۆشی.له‌به‌ر چی تۆی
له‌و پێ باشتره‌؟
قژڕه‌ش:منیش نازانم.به‌ڵام ئه‌گه‌ر ده‌کرێ بۆ خۆی بێنن لێی بپرسن.با جارێکی
دیکه‌ بیبینم.
قازێ:[له‌ میزه‌که‌ ده‌کوتێ] کۆتایی دادگا راده‌گه‌یه‌ندرێ.
 باخی گشتی،رۆژ.
قژڕه‌ش سواری کالێسکه‌یه‌ک ده‌که‌ن دوو کالێسکه‌ی پارێزه‌ری دیکه‌شی له‌ گه‌ڵن.کاتێ ده‌گه‌نه‌ داره‌که‌ی جاران دایده‌به‌زێنن.هه‌ر دوو ده‌ستی له‌ پشته‌وه‌ به‌ ته‌ناف به‌ستراوه‌.په‌تی سێداره‌ی ده‌خه‌نه‌ مل.کالێسکه‌چێکان هه‌وساری ملی ئه‌سپه‌کان ده‌که‌نه‌وه‌.کاتێ ده‌ستووری ئیعدام ده‌درێ ده‌ستێک ته‌نافه‌که‌ ده‌کێشێ .ئه‌سپکه‌ جڵه‌و به‌ربووه‌کان به‌ره‌و ده‌ریا راده‌که‌ن.

 نه‌خۆشخانه‌،رۆژ.

کامێراکه‌ له‌ رێڕه‌وی نه‌خۆشخانه‌که‌دا ده‌گه‌ڕێ،هات و چۆ به‌رده‌وامه‌.کاتێ ده‌گاته‌ ئه‌و دیوه‌ی گوێزه‌ل - یان لێ خه‌واندووه‌،له‌ پێشدا پیره‌پیاو و پاشان دایکی گوێزه‌ل دێنه‌ده‌ر.گوێزه‌ل به‌ ته‌نیا ده‌مێنێته‌وه‌.گوێزه‌ل هه‌ندێک سه‌بر ده‌کات.پاشان هه‌ڵده‌ستێ بێ ئامانج به‌م لا و ئه‌و لادا ده‌گه‌ڕێ.شتێک به‌ بیری ده‌گا.شووشه‌ی ده‌واکان هه‌ڵده‌گرێ.سه‌ره‌که‌ی ده‌کاته‌وه‌ تا رۆی ‌کاته‌ سه‌ر له‌پی ده‌ستی.به‌ڵام هیچ حه‌بی تێدا نه‌ما بوو.بیر له‌ رێگا چاره‌یه‌کی دیکه‌ ده‌کاته‌وه‌.
کامێرا دیسان له‌ رێره‌وی نه‌خۆشخانه‌که‌وه‌ به‌ره‌و لای ژووره‌که‌ی گوێزه‌ل ده‌ڕوا،رێڕيوه‌که‌ چۆڵه‌ و ده‌نگی ئه‌و گۆرانییه‌ی گوێزه‌ل له‌ چێشتخانه‌ ده‌یکوت له‌ رادیۆکه‌وه‌ به‌ هێواشی دێته‌ به‌ر گوێ.کامێرا ده‌گاته‌ ژووره‌که‌ی گوێزه‌ل.گوێزه‌ل له‌ ته‌رکی ژووره‌که‌دا که‌وتووه‌.
 باغچه‌ی گشتی ،رۆژ.
پیره‌پیاو له‌ نێو داره‌کاندایه‌.ده‌نگی داخرانی ده‌رگای قه‌فه‌زه‌که‌ ده‌بیسێ،خۆی ده‌گه‌یه‌نێته قه‌فه‌زه‌که‌،قه‌نارێکه‌ پێوه‌ نووه‌.
 که‌شتی،رۆژ.
گوێزه‌ل له‌ سه‌ر سه‌نده‌ڵییه‌ک دانیشتووه‌.قژکاڵی بۆیاغچیش دێت و له‌ ته‌نیشت گوێزه‌ل داده‌نیشێ.که‌ل و په‌لی بۆیاغه‌که‌شی پێیه‌.
گوێزه‌ل:ئه‌و کابرا پیره‌ت دیوه‌؟[قژکاڵ چاوی لێده‌کا] زۆر له‌ مێژه‌ به‌ دوای ئێمه‌وه‌یه‌.تائێستا دووجار بۆ مێرده‌که‌می گێڕاوه‌ته‌وه‌.وه‌ره‌ با لێره‌ بڕۆین .

هه‌ڵده‌ستن و سواری که‌شتییه‌ مسافربه‌ره‌که‌ ده‌بن.پیره‌پیاو له‌ کاتێکدا قه‌فه‌زی قه‌نارێکه‌ی به‌ کۆڵه‌وه‌یه‌ پاش ماوه‌یه‌ک خۆی ده‌گه‌یه‌نێته‌ سه‌ر که‌شتێکه‌.گوێزه‌ل و قژکاڵ له‌ په‌نای دیواری که‌شتێکه‌ راوه‌ستاون و به‌ یه‌که‌وه‌ قسه‌ ده‌که‌ن.پیره‌پیاو به‌ ماته‌ ماته‌ خۆیان لێ نزیک ده‌کاته‌وه‌،کاتێ ده‌زانێ ئه‌وان دیتویانه‌،ده‌چێته‌ پێشێ.
پیره‌پیاو:ده‌مه‌وێ که‌وشه‌کانم بۆیاغ که‌م.
قژکاڵ داوای لێده‌کا له‌ سه‌ر سه‌نده‌ڵێکه‌ دانیشێ.که‌وشه‌کانی داده‌که‌نێ و په‌ڕۆیه‌ک له‌ ژێر پێی پیره‌پیاودا راده‌خات و که‌وشه‌کان ده‌با.
قژکال:ئێستا ده‌یانهێنمه‌وه‌.ده‌بێ له‌ پێشدا بیانشۆم.
ده‌چێته‌ سه‌ر سه‌کۆی که‌شتێکه‌.له‌ دواین ساتدا له‌ که‌لێنی ده‌رگاکه‌وه‌ ئاماژه‌ بۆ گوێزه‌ل ده‌کا به‌ دوایدا بڕوات.پیره‌پیاو وه‌رده‌سووڕێ و ده‌ڕوانێته‌ گوێزه‌ل.که‌شتی له‌نگه‌ر ده‌گرێ.گوێزه‌ل و قژکاڵ له‌گه‌ڵ مسافیره‌کان داده‌به‌زن.پیره‌پیاو هه‌ر چاوه‌ڕوانه‌.
 ماڵی گوێزه‌ل،شه‌و.
له‌ زه‌نگی ده‌رگاکه‌ ده‌ده‌ن.گوێزه‌ل له‌ چێشتخانه‌ دێته‌ ده‌رێ و ده‌رگاکه‌ ده‌کاته‌وه‌.پیره‌پیاو له‌ پشت ده‌رگاکه‌یه‌.گوێزول نازانێ بڵێ چی.پیره‌پیاو زه‌ق زه‌ق لێی ده‌ڕوانێ هه‌ڵێ ده‌سه‌نگێنێ.گوێزه‌ل ده‌رگاکه‌ پێوه‌ ده‌دا.پیره‌پیاو له‌ زه‌نگ ده‌داته‌وه‌.گوێزه‌ل هه‌روا پشتی به‌ ده‌رگاکه‌وه‌ داوه‌و راوه‌ستاوه‌.پیره‌پیاو هه‌ر له‌ زه‌نگ ده‌دا،ئاخری گوێزه‌ل ناچار ده‌بێ ده‌رگاکه‌ ده‌کاته‌وه‌.پیره‌پیاو دیسان هیچ ناڵێت
گوێزه‌ل:چیت ده‌وێ؟
پیره‌پیاو:که‌وشه‌کانم .
گوێزه‌ل:بۆ دایم به‌ دوامه‌وه‌ی؟
پیره‌پیاه‌:ئه‌وه‌ رازێکه‌.
گوێزه‌ل:که‌وشه‌کانت به‌ من نین.
گوێزه‌ل ده‌رگاکه داده‌خا.پیره‌پیاو دیسان له‌ زه‌نگه‌که‌ ده‌داته‌وه‌.گوێزه‌ل پاڵ به‌ ده‌رگاکه‌وه‌ ده‌دا و مسته‌حیل راده‌وه‌ستێ و نازانێ چی بکات.زه‌نگی ده‌رگاکه‌ به‌رده‌وام لێده‌درێت.ورده‌ ورده‌ ده‌رگاکه‌ ده‌که‌وێته‌ به‌ر مست و پێلاقه‌.
گوێزه‌ل له‌ ده‌رگاکه‌ دوور ده‌که‌وێته‌وه‌ و له‌ قوژبنێکی ژووره‌که‌ جوتێ که‌وشی مێرده‌که‌ی هه‌ڵده‌گرێ.ده‌رگاکه‌ ده‌کاته‌وه‌ و که‌وشه‌کان ده‌خاته‌ ده‌رێ و ده‌رگاکه‌ داده‌خاته‌وه‌.پیره‌پیاو که‌وشه‌کان له‌ پێده‌کات،پڕ به‌ پێیه‌تی.دیسان دایانده‌که‌نێ و له‌ زه‌نگ ده‌داته‌وه‌.ده‌رگا ناکرێته‌وه‌.چه‌ند جارله‌ زه‌نگه‌که‌ ده‌دات.ده‌رگا ده‌کرێته‌وه‌ و گوێزه‌ل له‌ که‌لێنی ده‌رگاکه‌وه‌ سه‌ر سام و تووڕه‌ ته‌مه‌شای ده‌کات.
پیره‌پیاو:ئه‌م که‌وشانه‌ له‌هینه‌کانی خۆم تازه‌ترن.ئێوه‌ چۆن دڵتان دێت
کڵاو له‌ سه‌ر مێرده‌که‌تان نێن؟‌
گوێزه‌ل:تکات لێده‌که‌م بڕۆ.نامه‌وێ مێرده‌که‌م شک بکات.
پیره‌پیاو که‌وشه‌کان له‌ پێ ده‌کاو ده‌ڕوات.
 به‌ر ده‌رگای ماڵی گوێزه‌ل،ساتێ دواتر.
قژڕه‌ش دێته‌وه‌،له‌ زه‌بته‌که‌یه‌وه‌ ده‌نگی موسیقا دێت.پیره‌ پیاو ده‌چێته‌ پێشێ و به‌ر له‌وه‌ی قژڕه‌ش دابه‌زێ له‌ شووشه‌که‌ ده‌دا.قژڕه‌ش شووشه‌که‌ داده‌داته‌وه‌.
پیره‌پیاو:پیاوی چاک که‌نگێ ده‌ته‌وێ پێشی ئه‌و ژنه‌ت بگری؟تائێستا
حه‌وت جار به‌ چاوی خۆم دیتومه‌ وه‌ختێ تۆ له‌ سه‌ر کاری ئه‌و له‌گه‌ڵ
کابرایه‌کی غه‌ریبه‌ له‌و باغی گشتی خه‌ریکی دڵداری کردنه‌.
قژڕه‌ش:ژنی من!؟
پیره‌پیاو:باوه‌ڕ ناکه‌ی گوێ له‌ ده‌نگیان بگره‌.
زه‌بته‌که‌ له‌گیرفانی ده‌ردێنێ و نه‌واره‌که‌ی نێوی ده‌ردێنێ و ده‌یداته‌ ده‌ست قژڕه‌ش.قژڕه‌ش به‌ دوودڵێه‌وه‌ چاو له‌ نه‌واره‌که‌ ده‌کات.پاشان نه‌واری مه‌سیقاکه‌ له‌ زه‌بته‌که‌ی ده‌ردێنێ و نه‌واره‌ تازه‌که‌ی ده‌خاته‌ سه‌ر.
ده‌نگی باڵنده‌ دێت.
پیره‌پیاو:له‌ پێشتره‌وه‌یه‌.
قژڕه‌ش نه‌واره‌که‌ ده‌خاته‌ پێشێ،به‌ڵام دیسان هه‌ر ده‌نگی باڵنده‌ دێت.
پیره‌پیاو:بۆ خۆم ده‌نگیانم زه‌بت کرد.حه‌تمه‌ن له‌و دیوه‌ی دیکه‌ی دایه. قژڕه‌ش نه‌واره‌که‌ ده‌خاته‌ دیوه‌که‌ی دیکه‌ و هه‌رچی ئه‌م باره‌ و ئه‌وباری ده‌کات هه‌ر ده‌نگی باڵنده‌ دێت.
پیره‌پیاو:ده‌توانی بێی له‌ باغی گشتی بیانبێنی.
 ماڵی گوێزه‌ل،درێژه‌.
قژڕه‌ش ده‌چێته‌ ژوورێ.ئه‌و گوڵه‌ی بۆ گوێزه‌لی کڕیوه‌ به‌ ده‌ستێوه‌یه‌تی.گوێزه‌ل له‌ چێشتخانه‌که‌وه‌ ناره‌ی دێت.قژڕه‌ش له‌ به‌ر ده‌رگای چێشتخانه‌که‌ راده‌وه‌ستێ،چاو له‌ گوێزه‌ل ده‌کات.گوێزه‌ل له‌ روانینه‌که‌ی سه‌ر سام ده‌بێت و خۆی لێ ده‌دزێته‌وه‌،به‌ڵام تاقه‌ت ناهێنێ دیسان ته‌مه‌شای ده‌کاته‌وه‌.قژڕه‌شيش به‌ توڕيیه‌وه‌ چاوی بڕیوه‌ته‌ گوێزه‌ل و دانه‌ دانه‌ په‌لکی گوڵه‌که‌ هه‌ڵده‌وه‌رێنێته‌ عه‌رزی.پاشان سووکێ قایشی شاڕواڵه‌که‌ی له‌ قه‌دی ده‌کاته‌وه‌ و له‌ ده‌ستی ده‌ئاڵێنێ و په‌لاماری گوێزه‌ل ده‌دا.گوێزه‌ل ده‌قیژێنێ و خۆ له‌ باوه‌شی ده‌هاوێ.قژڕه‌ش هه‌روا لێیده‌دا.گوێزه‌ل له‌ چێشتخانه‌که‌ راده‌کا.کامێرا له‌ چێشتخانه‌که‌‌ راده‌وه‌ستێ.قژڕه‌ش وه‌دوای گوێزه‌ل ده‌که‌وێ،ده‌نگی قامچی و قیژه‌ی گوێزه‌ل و ئه‌م باره‌وباری که‌ل و په‌لی ماڵه‌که‌ دێت،چێشتی سه‌ر گازه‌که‌ سووتاوه‌و دووکه‌ڵ ده‌کات.
 تاکسی،شه‌و.گوێزه‌ل
گوێزه‌ل به‌ گیانی خوێناویه‌‌وه‌ له‌پشته‌وه‌ی تاکسێکه‌دا که‌وتووه‌ وقژڕه‌ش لێی ده‌خوڕێ.وه‌رده‌سووڕێ و به‌ڕقه‌وه‌ ته‌مه‌شای گوێزه‌ل ده‌کات و وێنه‌که‌ی سور فه‌رمانه‌که‌ لێ ده‌کاته‌وه و به‌ددان ورد و کوتی ده‌کات.
 نه‌خۆشخانه‌،درێژه‌.‌
په‌رستارێک گوێزه‌ل ده‌رمان ده‌کات.
په‌ر‌ستار:ئه‌وه‌ بۆ وات لێهاتووه‌؟
گوێزه‌ل هیچ ناڵێت.
قژڕه‌ش:مێرده‌که‌ی لێی داوه‌.
په‌رستار:بۆچی؟
قژڕه‌ش:ئه‌وه‌نده‌ی خۆش ده‌وێ بۆیه‌.

ماڵی گوێزه‌ل،سه‌عاتێ دواتر.
گوێزه‌ل به‌ پانسمان کراوی له‌ گه‌ڵ قژڕه‌ش دێنه‌وه‌ بۆ ماڵێ.گوێزه‌ل له‌ قوژبنێک داده‌نیشێ.قژڕه‌شیش له‌و لاوه‌تر داده‌نیشێ.پاش تاوێک هه‌ڵده‌ستێ قایشی شه‌ڕواڵه‌که‌ی ده‌ردێنێ و رووده‌کاته‌ گوێزه‌ل.گوێزه‌ل ده‌قیژێنێ و راده‌کات،کامێرا‌ له‌ نێو ئاوێنه‌که‌وه‌ ده‌یانبینێ،جار جار به‌دوای یه‌کتردا به‌به‌ر ده‌م ئاوێنه‌که‌دا تێده‌په‌ڕن.شتێک له‌ ئاو‌ێنه‌که‌ ده‌که‌وێ و ده‌شكێ.ئێستا ته‌نیا ده‌نگیان دێت و له‌ ئاوێنه‌ شکاوه‌که‌دا هیچ دیار نییه‌.
 تاکسی،ساتێک دواتر.
گوێزه‌ل به‌ پانسمانی شه‌ڵاڵی خۆێنه‌وه‌ له‌ سه‌ر سه‌نده‌ڵی پشته‌وه‌ که‌وتووه‌ و قژڕه‌ش تاکسێکه‌ لێده‌خوڕێ.گۆرانی "من ئه‌وینی تۆ له‌ دڵما وه‌ک نه‌هێنییه‌ک راده‌گرم ".له‌ زه‌بته‌که‌وه‌ دێته‌ به‌ر گوێ.
 نه‌خۆشخانه‌،ساتێک دواتر.
په‌رستارێکی دیکه‌ پانسمانه‌ خوێناوێکه‌ی گوێزه‌ل لێ ده‌کاته‌ه‌وه‌.قژڕه‌ش راوه‌ستاوه‌ ته‌مه‌شا ده‌کات.
په‌رستاره‌تازه‌که‌:ئه‌وه‌ بۆ وات لێهاتووه‌؟
گوێزه‌ل هیچ ناڵێت.
قژڕه‌ش:مێرده‌که‌ی لێی داوه‌.
په‌رستاره‌ تازه‌که‌:بۆچی!؟
قژڕه‌ش:ئه‌وه‌نده‌ی لێ بێزاره‌ بۆیه‌.
ماڵی گوێزه‌ل،سه‌عاتێک دواتر.
گوێزه‌ل به‌ پانسمانی تازه‌وه‌ به‌ڵام داماوتر له‌ پێشوو له‌ گه‌ڵ قژڕه‌ش دێنه‌وه‌ ماڵێ.گو‌ێزه‌ل‌ له‌ترساندا خۆ ده‌خا به‌سه‌ر لاقی قژڕه‌ش دا.
گوێزه‌ل:ئیتر لێم مه‌ده‌ توانای خۆڕاگریم نییه‌.
قژڕه‌ش هه‌ڵیده‌ستێنێ و به‌ مێهره‌بانیه‌وه‌ له‌سه‌ر ته‌خته‌که‌ ده‌یخه‌وێنێ.پاشان له‌ ته‌نیشت ته‌خته‌که‌ هه‌ڵده‌ستێ و په‌رده‌ی په‌نجه‌ره‌که‌ لاده‌دا.رۆژ بۆته‌وه‌.ده‌چێته‌ چێشتخانه‌که‌،چه‌قۆیه‌ک هه‌ڵده‌گرێ،له‌ گیرفانی ده‌نێ و له‌ماڵێ وه‌ده‌ر ده‌که‌وێ.
 باخچه‌ی گشتی،رۆژ.
قژکاڵ له‌و لاوه‌ دێت.ده‌یانبینێ.دێ بگه‌ڕێته‌وه‌.پیره‌پیاو هه‌رای لێده‌کا.
پیره‌پیاو:ئه‌هۆی بۆیاغچی،بۆیاغچی.
قژکاڵ دێته‌ پێشێ،دوو دڵه به‌ڵام هه‌ر دێت.
قژڕه‌ش:وه‌ره‌ ئه‌م که‌وشانه‌م بۆ بۆیاغ که‌.
قژکاڵ که‌ل و په‌له‌که‌ی داده‌نێ و خه‌ریکی بۆیاغ کردنی که‌وشی قژڕه‌ش ده‌بێت.قژڕه‌ش قامکی له‌ قوتوی بۆیاغه‌که‌ رۆ ده‌کا و هه‌ر به‌و ده‌سته‌ی چه‌قۆکه‌ی پێیه‌ له‌سه‌رو چاوی قژکاڵی هه‌ڵده‌ساوێ.قژکاڵ به‌ سه‌ر خۆی ناهێنێ و بۆیاغی که‌وشه‌کانی قژڕه‌ش ته‌واو ده‌کات.پیره‌پیاو لاقی ده‌نێته‌ سه‌رقوتوی که‌ل و په‌له‌که‌ی هه‌تا که‌وشه‌کانی ئه‌ویش بۆیاغ بکات.قژکاڵ سه‌روچاوی به‌شاڵگه‌ردنه‌که‌ی ده‌سڕێ و ته‌مه‌شایه‌کی قژڕه‌ش ده‌کات،خۆین به‌ری چاوی گرتووه‌ و کایه‌ به‌چه‌قۆکه‌ ده‌کات.
قژکاڵ خه‌ریکی بۆیاغ کردنی که‌وشه‌کانی پیره‌پیاو ده‌بێ.پیره‌پیاو قوتوی بۆیاغه‌که‌ هه‌ڵده‌گرێ و هه‌ر وه‌ک قژڕه‌ش به‌و لایه‌ی دیکه‌ی ده‌م و چاوی قژکاڵی دادێنێ.قژکاڵ له‌ پڕ هه‌ڵده‌ستێ و هه‌ڵدێ.قژڕه‌ش وه‌دوای ده‌که‌وێ.
 شه‌قام،رۆژ.
قژکاڵ به‌ سه‌روچاوی ره‌شه‌وه‌ به‌ شه‌قامدا راده‌کات و به‌ شاڵگه‌ردنه‌که‌ی سه‌روچاوی ده‌سڕێ.قژڕه‌ش به‌دوایدا هه‌ڵدێ.
 ئیسکله‌ی مسافیرهه‌ڵگره‌کان،درێژه‌.
قژکاڵ ده‌چێته‌ ناو ئیسکله‌که‌وه‌،به‌سه‌ر ئه‌و ئاوسنه‌ی بۆ له‌مپه‌ری مسافیره‌ بێ بلیته‌کان دایان ناوه‌ باز ده‌دا و به‌روه‌ لای ئه‌و گه‌میه‌ی لایداوه‌ته‌ که‌نار ده‌چێت.
قژڕه‌شیش له‌ ئاسنه‌که‌ ده‌په‌ڕێته‌وه‌.مه‌عمورێک پێشی ده‌گرێ.قژڕه‌ش‌ بڕێک پاره‌ له‌ گیرفانی ده‌ردێنێ و له‌ باتی بلیت ده‌یخاته‌ مستێ مه‌عموره‌که‌وه‌ وخۆی‌ ده‌گه‌یه‌نێته‌ گه‌مێکه‌.
 شوێنه جۆراو‌جۆره‌کانی گه‌می،درێژه‌.
قژڕه‌ش له‌ نێو مسافیره‌کاندا به‌ دوای قژکاڵ دا ده‌گه‌ڕێ به‌ڵام نایدۆزێته‌وه‌.ده‌رگای مه‌باله‌کان یه‌ک به‌یه‌ک ده‌کاته‌وه‌ و نایبینێته‌وه‌.ده‌چێته‌ سه‌ر سه‌کۆی گه‌مێکه‌ دیسان هه‌ر نایبینێته‌وه‌.
له‌ دوایین ساتدا قژکاڵ ده‌بینێ له‌ په‌نایه‌ک خۆی شاردۆته‌وه‌.بۆ لای ده‌چێ و هێرش ده‌کاته سه‌ری.شه‌ڕ ده‌ست پێده‌کات،به‌ڵام ئێمه‌ نایانبینین،چونکێ به‌رداوام شتگه‌لێک پێش چاومان ده‌گرن.ئێسته‌ چه‌قۆکه‌ که‌وتۆته‌ ده‌ست قژکاڵ.په‌لاماری قژڕه‌ش ده‌دات.چه‌قۆکه‌ له‌ سه‌ر ملی قژڕه‌ش راده‌گرێ.قژڕه‌ش ماندوو داماو خۆ به‌ده‌سته‌وه‌ ده‌دات.
قژکاڵ:نات کوژم چونکێ بۆوه‌ نه‌هاتوینه‌ته‌ ئه‌م دنیایه‌ یه‌کتری
بکوژین‌[چه‌قۆکه‌ ده‌داته‌وه‌ ده‌ست قژڕه‌ش]به‌ڵام حازرم
بمرم[ده‌ستی قژڕه‌ش و چه‌قۆکه‌ له‌سه‌ر ملی خۆی داده‌نێ]بمکوژه‌
به‌ده‌ست خۆم نییه‌ ناتوانم خۆشم نه‌وێت.
ته‌لاری زه‌ماوه‌ند،رۆژ
ته‌لارێکی چکۆڵه‌و جوان و روو به‌ ده‌ریا بۆ ئاهه‌نگی زه‌ماوه‌ند رازاوه‌ته‌وه‌.گوێزه‌ل به‌ جلی بووکێنێه‌وه‌ و قژکاڵ به‌ لیباسی سپی زاوایه‌تییه‌وه‌ له‌ ته‌نیشت یه‌ک دانیشتوون.قازیش له‌په‌نایانه‌‌ و قژڕه‌ش به‌ لیباسه‌کانی جارانیه‌وه‌ میوانداری له‌ میوانه‌کان ده‌کات.
دایکی گوێزه‌ل ده‌یه‌وێ زه‌ماوه‌نده‌که‌ به‌جێ بهێڵێ.قژڕه‌ش پێشی گرتووه‌ و ناچاری ده‌کات بمێنێته‌وه‌.
قازی:له‌ مێژه‌ حه‌ز ده‌که‌م وه‌ک که‌سێکی ئاسایی بژیم.ته‌مه‌نێک بوو رۆڵی
کۆمه‌ڵایه‌تیم به‌ڕێوه‌ ده‌برد.له‌ حه‌وتوی رابردووه‌ که‌ هه‌اڵی زه‌ماوه‌ندی
ئێوه‌م بیست،پیشه‌ی دادوه‌ریم به‌جێهێشت و ده‌فته‌ری زه‌ماوه‌ندم
داناوه‌.قه‌زاوه‌ت بۆ که‌سێک ده‌بێ که‌ بیر له‌ئاکامی تاوانکه‌ بکاته‌وه‌ نه‌ک
هۆیه‌که‌ی.هه‌ر تاوانبارێکم مه‌حکوم ده‌کرد و هۆیه‌که‌یم ده‌بیست به‌و ئاکامه‌
ده‌گه‌یشتم ئه‌گه‌ر منیش له‌ جیاتی ئه‌و بوایه‌م...
پیره‌پیاو دێته‌ ژوورێ.قه‌فه‌زی قه‌نارێکانیشی پێیه‌.به‌دوای قژڕه‌شدا ده‌گه‌ڕێ.له‌ ده‌نگی ئه‌وموسیقایه‌ی بڵاو ده‌بێته‌وه بێزاره‌.خۆی ده‌گه‌یه‌نێته‌ قژڕه‌ش.
پیره‌پیاو:قه‌نارێکانی خۆمم بۆ هێناوی.له‌ ته‌نیایی رزگارت ده‌که‌ن.به‌ڵام ئه‌م
کاره‌ت بۆ کرد.؟
قژڕه‌ش له‌ ته‌نیشت میزێک داده‌نیشێ.سه‌یرێکی قه‌نارێکان ده‌کات.پاشان چاو له‌ چاوی پیره‌پیاو ده‌بڕێ.
قژڕه‌ش:دوو ساڵ عاشقی بووم.شه‌وانه‌ دهاتمه به‌ په‌نجه‌ره‌که‌یان گۆرانیم
بۆده‌کوت،ئه‌و ئاوی به‌سه‌رمدا ده‌ڕشت و زیاتر شه‌یدای خۆی ده‌کردم.ئه‌و
ده‌مه‌ی بۆت گێڕامه‌وه‌ لێم دا.خۆشم ده‌ویست.بۆ لێـم دا؟بۆ لێم دا؟(کوڵی گریانی
هه‌ڵده‌ستێ.)ئه‌ویش عاشق بوو.کاتێ من ده‌توانم عاشق بم.ئه‌و بۆ ناتوانێ عاشق
بێت؟

پیره‌پیاو توانای بیستنی قسه‌کانی قژڕه‌شی نییه‌.ده‌ست ده‌کا به‌گریان.سه‌معه‌که‌که‌ی ده‌ردێنێ و ده‌ڕوانێته‌ رووخساری قژڕه‌ش.ده‌نگی ناو دیمه‌نه‌که‌ ته‌واو ده‌بێ.قژڕه‌ش دیسان قسه‌ ده‌کا.ده‌گری و ته‌نانه‌ت جارجاره‌ش پێده‌که‌نێ به‌ڵام ده‌نگی نابیستین.پیره‌پیاو وێڕای ئه‌و پیده‌که‌نێ و ده‌گری پاشان هه‌ڵده‌ستێ،ده‌چێته‌ لای میزی بوک و زاوا به‌ڕقه‌وه‌ سه‌یرێکیان ده‌کات و ده‌ڕواته‌ ده‌رێ.له‌ گه‌ڵ رۆیشتنی ئه‌م ده‌نگه‌که‌ ده‌گه‌ڕێته‌وه‌ بۆ زه‌ماوه‌نده‌که‌،قژڕه‌ش به‌ قه‌نارێکانه‌وه‌ ده‌چێته‌ لای میزه‌که‌ی گوێزه‌ل.
قازی:[ده‌ست له‌سه‌رشانی قژڕه‌ش داده‌نێ]ده‌زانی ئێمه‌ که‌سایه‌یته‌
راسته‌قینه‌کانی خۆمان نین.که‌س باوه‌ڕمان پێ ناکات.تۆ ده‌بوایه‌ ئه‌م
کابرایه‌ت بکوژتایه‌.منیش تۆم له‌ سێداره‌ دابایه‌و،ژنه‌که‌شت ده‌بوایه‌
چاره‌نووسێکی تاڵی بوایه‌.
قژڕه‌ش ئاڵقه‌که‌ی په‌نجه‌ی ده‌ردێنێ و ده‌یداته‌ ده‌ست گوێزه‌ل.
قژڕه‌ش؛بیده‌ به‌هه‌ر که‌سێکی خۆشت ده‌وێ.
قژڕه‌ش ماشێنه‌که‌ لێ ده‌خوڕێ.گوێزه‌ل و قژکاڵ له‌ سه‌نده‌ڵی پشته‌وه‌ دانیشتوون،هه‌ر یه‌که‌ی له‌ شووشه‌ی لای خۆیه‌وه‌ سه‌یری ده‌ره‌وه‌ ده‌کات.ماشێنه‌که‌ ده‌گاته‌ به‌ر ده‌رگای ماڵی گوێزه‌ل.له‌ ڕێکی هێڵه‌که‌ راده‌وه‌ستێ،به‌جۆرێک که‌ شه‌وقی چراکانی ده‌که‌وێته‌ سه‌ر هێڵه‌که‌.قژڕه‌ش داده‌به‌زێ.سیوجی تاکسێکه‌ ده‌داته‌ ده‌ست قژکاڵ.
قژڕه‌ش:دیاری زه‌ماوه‌نده‌که‌تانه‌.خودا حافیز.
قژڕه‌ش به‌ قه‌فه‌زی قه‌نارێکانه‌وه‌ به‌سه‌ر هێڵه‌که‌دا ده‌ڕوات.تیشکی چرای ماشێنه‌که‌ سێبه‌رێکی درێژی لێ دروست کردووه‌،گوێزه‌ل و قژکاڵ ته‌مه‌شای
یه‌کتر ده‌که‌ن.
قژکاڵ:ئه‌وه‌ ئێمه‌ین به‌یه‌ک گه‌یشتین!؟
گوێزه‌ل:دیسانیش به‌خته‌وه‌ر نیم .!
قژکاڵ:به‌خته‌وه‌ری چییه‌؟
گوێزه‌ل:نازانم!ئێستا هه‌ست ده‌که‌م ئه‌وم خۆشتر ده‌وێ.
قژکاڵ:ده‌چم ده‌یهێنمه‌وه‌،منیش ئاشقی ئه‌شقم،نه‌ک ئاشقی مه‌عشوق.
له‌ ماشێنه‌که‌ داده‌به‌زێ و به‌ دوای قژڕه‌ش دا هه‌ڵدێ.
قژکاڵ:ئه‌هۆی راوه‌سته‌،راوه‌سته‌.
خۆی ده‌گه‌یه‌نێته‌ قژڕه‌ش له‌ پشته‌وه‌ وه‌ک تاپۆیه‌ک ده‌چێ به‌ده‌ست له‌پشتی ده‌دا.تاپۆکه‌وه‌رده‌سووڕێ.پیره‌پیاوه‌.باوه‌ڕ ناکه‌ن.چاو له‌ چاوی یه‌کتر ده‌بڕن.پاشان پیره‌پیاو باوش به‌قژکاڵ دا ده‌کات.
پیره‌پیاو:بمبوره‌ میزه‌که‌تانم به‌ جێهێشت.به‌ ده‌ست خۆم نه‌بوو.خۆم پێ رانه‌گیرا.بۆخۆم هاوده‌رده‌ی تۆ بووم.قه‌ناری ته‌نیا بیانویه‌ک بوو.گوێزه‌ل ئێستا له‌ کۆیه‌؟‌

۲ نظر:

  1. 1) سڵاو کاکه‌ ره‌سووڵ گیان، ئه‌حواڵی بنه‌ماڵه‌ی به‌ڕێزتان ده‌پرسم و چاوه‌ جوانه‌کانت ماچ ده‌که‌م ، کاکی خۆم بۆ بڵاو کردنه‌وه‌ی هه‌ر بابه‌تێک که‌ به‌ شیاوت زانی " تام الاختیاری" هیچ کات پێم خۆش نییه‌ مامۆستای وه‌ک جه‌نابت به‌ ئیزن و ئیجازه‌ له‌ من ئه‌م کاره‌ بکه‌ی .
    2)من بابه‌ته‌که‌ی جه‌نابتم نه‌دیوه‌ ، ئه‌گه‌ر به‌ " ایمیل " بۆمی بنێری ممنوون ده‌بم .
    3) ئێستا هه‌ر ئه‌م وتاره‌و هه‌م وتاری " ئاسۆکانی خوێندنه‌وه‌ی ده‌ق که‌ شێعری " که‌ چی " جه‌نابیشتی تێدا به‌ هێندێک هه‌ڵه‌ی فۆنتی و فۆڕمیکه‌وه‌ له‌ سایتی ئه‌نجومه‌نی قه‌ڵه‌م- دا بڵاو کراوه‌ته‌وه‌ . ئه‌گه‌ر پێت خۆش بوو سه‌ردانی بفه‌رموو: www.qelem.com
    4) هه‌ر کات دڵته‌نگ ده‌بم به‌ کۆڵانه‌ کانی پڕ له‌ خۆشه‌ویستی وێبلاگی (شیکار)دا تێده‌په‌ڕم و دوای وچانێک تێر تێر ده‌هه‌سێمه‌وه‌ ، سپاس بۆ شیکار و خوڵقێنه‌ری شیکار.
    5) به‌ هیوای ساڵی دوو به‌هارو هه‌ر رۆژتان نه‌ورۆزو نه‌ورۆزتان پیرۆز.
    براتان : عه‌ لی قاسمی .

    پاسخحذف
  2. سلاو کاک رەسوول گیان دەسپيکی دووبارەتان و هاتنەوەتان بو نيو جیهانی ئینتيرنيت و ئە و شتانە تان پیروز بایی پي دەليم و دەست خوشانە و ماندوو نەبوونی دەليم بە فەوزي خانم بؤ ئەو وەرگيرانە جوانە.

    پاسخحذف

بۆ دانانی بۆچوون سه‌ره‌تا نام/آدرس اینترنتی
یان ئه‌گه‌ر ناتهه‌وێ بناسرێی { ناشناس }هه‌ڵبژێره‌ و پاشان له‌ سه‌ر - انتشار نظر- کرته‌ بکه‌

گه‌ڕان له‌م ماڵۆچکه‌دا