به خاتری مێژوو..به‌خاتری خۆمان ..به‌خاتری..
بنه‌مای فیکری و قه‌واره‌ی ده‌سه‌ڵاتی دیکتاتۆره‌کان له گه‌ڵ هه‌موو دژوازی و جیاوازیه‌کیان،له زۆر خاڵی هاوبه‌شدا ده‌چنه خانه‌یه‌که‌وه که به روانینێکی سه‌رسه‌ره‌کی هه‌ست به قووڵی تراژیدیای ژیانی ئه‌و که‌سانه ده‌که‌ی له ژێر سێبه‌ری ئه‌و حکوومه‌تانه‌دا ده‌ژین . دیکتاتۆڕه‌کان سه‌رجه‌میان موقه‌دده‌سن ، گه‌مژه‌ن ، پێره‌وی هه‌وه‌س و نیازه به‌ر ته‌سکه‌کانی تاکه که‌سی و تاقمیه‌کانی خۆیانن ،خۆیان له هه‌موو هێزو ئیراده‌یه‌ک زانا ترو به ده‌سه‌ڵاتترده‌بینن ، هه‌موو که‌سێک به شارڵاتان و چه‌قۆکێش و سیخوڕ و نۆکه‌ری بێگانه دێته به‌رچاو،چه‌مکی دێموکراسی له گه‌ڵ بنه‌ما فیکری و قه‌واره نه‌گۆڕه‌کانی ده‌سه‌ڵاتیان گونجاو نیه به‌ڵام تاک به تاکیان رووکه‌شی پیاوێکی دێموکڕاتیان به سه‌ر خۆیان هه‌ڵکێشاوه . قه‌واره‌یه‌کی پته‌و و نه‌گۆڕیان هه‌یه و هه‌موو گۆڕانکاریه‌ک به واتای هه‌ره‌سهێنان و تیاچوونی"بوون" و ده‌سه‌ڵاتی ئاسمانی و مێژوویی خۆیان ده‌زانن . له هه‌موو سه‌رنج راکێشتر ئه‌مه‌یه هیچکات پێیان وانیه ده‌توانن سه‌رده‌مێکی زۆر بمێننه‌وه .هه‌ربۆیه‌ش بۆ مانه‌وه‌ی خۆیان له هیچ کرده‌وه‌یه‌کی دژه ئینسانی و ناعه‌قڵانی ناپرینگێنه‌وه، دیکتاتۆڕه‌کان بۆ ئه‌وه‌ی حکوومه‌ت بکه‌ن ده‌بێ به‌رده‌وام به پیرۆزی و موقه‌دده‌سی بمێننه‌وه،ئه‌مه‌ش له پشت ته‌م و مژو تاریکیه‌کی هه‌میشه‌ییدا مسۆگه‌ر ده‌بێ بۆیه‌ش رۆشه‌نگه‌ری و کتێب و رۆژنامه گه‌وره‌ترین دوژمنی ئه‌وانه. دیکتاتۆڕه‌کان یه‌ک رۆژنامه‌یان هه‌یه یه‌ک کتێبیان هه‌یه .رووناکبیر و خاوه‌ن ئه‌ندیشه‌کانیان له کارگاکانی خۆیاندا درووست دکه‌ن.
ئه‌مانه جێێ داخ نین ،جێی داخ و که‌سه‌ر ئه‌مه‌یه ئه‌و خاکه‌ی سێبه‌ری دیکتاتۆڕێ به‌سه‌ر دا کشابێ ئه‌سته‌مه له دیکتاتۆر زیاتر شتێکی تر په‌روه‌رده بکات. بتهه‌وێ دیکتاتۆریه‌ت ریشه کێش بکه‌ی ده‌بێ ژێرخان و ناوه‌ڕۆکی ئه‌و خاکه‌ش بگۆڕی .ده‌بێ ئه‌و بته پڕ شکۆیانه‌ی ڕیشه‌یان له قووڵایی ئه‌و خاکه داهه‌یه و دزه ده‌که‌نه رۆحی ساواکانمان، بنبڕ بکه‌ین.ده‌بێ گومان بکه‌ین له جۆری گووران و فرچک گرتنی ئه‌و شته پیرۆز و پڕ شکۆیانه‌ی له ناخی خۆمان و ناخی ئه‌و خاکه نه‌فره‌ت لێکراوانه دا جێیان گرتوه که به‌رده‌وام دیکتاتۆڕی تێدا په‌روه‌رده ده‌کرێ.ده‌بێ نه‌ترسین له وێران کردن.نه‌ترسین له شێواندنی ئه‌و رێگا ته‌لسم کراوانه‌ی ئێمه‌ی پێدا تێده‌په‌ڕێنن . ئازادی یانی گه‌ییشتن بهو ئه‌و ره‌هابوونه هه‌راوه‌ی که پێچه‌وانه‌ی شته سه‌لمێندراوه‌کانی ئێستامانه.ئێمه نازانین ئازادی چیه ،چونکه تا ئێستا هه‌ستمان پێنه‌کردوه .به‌ڵام ده‌بێ ئازاد بین. ئه‌مه‌ش ده‌بێ نرخ و هه‌زینه‌یه‌کی گه‌وره‌ی بۆ بده‌ین.نرخی ئه‌و ئازادی و ره‌هاییه راسته‌قینه‌یه‌ش یه‌کیان خوێنی ئه‌و قه‌ڵه‌مه بچووک و بێ پشتیوان و بێ ده‌ره‌تانانه‌ن که یه‌کێک له‌وان ناوی عــــــه‌دنـــانی حـــه‌ســـه‌ن پـــوور"ه"
ئه‌مه یه‌که‌م جار نیه و دوایین جاریش نابێ بهو په‌ڕی شه‌رمه‌زاری و هه‌راسانیه‌وه کوێر کوێرانه باشترین رۆڵه‌کانی ئه‌و خاکه نه‌فره‌ت کراوه هه‌ڵده‌پاچن به‌ڵام ده‌بێ بکرێ بێهیچ دڕدۆنگیه‌ک ،له به‌ر خاتری مێژوو له به‌رخاتری خۆمان له‌به‌ر خاتری دوارۆژ ده‌بێ نه‌هێڵین عــــــه‌دنـــانی حـــه‌ســـه‌ن پـــوور" له سیداره بدرێ.............
بۆ پشتیوانی کردن له مافی ژیانی عه‌دنان حه‌سه‌نپوور و هیوا بووتیمار سه‌ردانی ئێره بکه‌ن:
kempainp@yahoo.com
adnanhasanpoor@yahoo.com
لاپه‌ره‌ی تایبه‌ت ی سایتی رێنێسانس
